Seldi kvikmyndina Heima til Mexíkó

Í júní fór ég á fræga Náttúrutónleika hjá Sigur Rós,  Björk og fleirum í Laugardalnum. Ég gerð lítið myndband um lagið Glósóla.  Ég hlóð því á YouTube og nú eru heimsóknir að nálgast sjö þúsund. Það hefur hlotið ágætis dóma þó að það sé hrátt.

Nokkrir notendur YouTube hafa gert jákvæðar athugasemdir og eru mjög hrifnir af þessum frábæru sendiherrum okkar. Einnig hefur mér borist póstur í gegnum póstkerfið á YouTube. Ég svara ávallt.  Einn aðdáandi Sigur Rósar frá Mexíkó skrifaði  og bað mig um að lýsa upplifun minni af  Náttúrutónleikunum.  Ég gaf tónleikunum toppeinkunn og hvatti hann til að kaupa DVD diskinn Heima til að kynnast stórbrotinni náttúr landsins. Mexíkóinn keypti diskinn þótt verðið væri hátt. Ég fékk nýlega skeyti frá Mexíkóanum.

"The last friday i bought the dvd of heima and it wasnt cheap but EVEN THOUGH I BOUGHT IT and i already see the disc one the documentary and its really beautiful all the towns with that weird names are really nice thank you for telling me that heima exists .. and in wich town u live ? "

Hvað gerir maður ekki fyrir náttúruna, aðdáendur Sigur Rósar og landið sitt - Heima er frábær landkynning!

Náttúran

Gærdagurinn var þétt pakkaður í náttúrunni.

Fyrst var tekið þátt í Esjudögum FÍ og SPRON við Esjurætur. Það var fjölmenni mætt á svæðið og margt skemmtilegt í boði. Við Ari fórum í skemmtilegan og þjóðlegan ratleik upp að brúnni yfir Mógilsá. Það voru fimm spurningar sem við leituðum uppi og fundum svörin við þeim. En verið var að leita að fjársjóði Egils Skallagrímssonar. Við keifuðum upp rætur Esju og mættum mikið af fólki á öllum aldri. Fyrir vikið misstum við af Jónsa, Karíus og Baktus og Júróbandinu.  En það var nú allt í lagi.

Ari var sportklæddur. Hann var í stuttbuxum en féll á niðurleið og rispaðist á hné. Það blæddi úr sárinu en hann bar sig vel. Á leiðinni niður mættum við góðu fólki. Mamman í hópnum átti plástur í fórum sínum og bauðst til að hjálpa Ara litla. Hann þáði boðið og leið betur á eftir. Það er  annars gaman að upplifa hvað fólk er kurteist á Esju og hjálpsamt. Allir bjóða góðan daginn og eintóm hamingja. Vandamálin eru skilin eftir niðri í borg.

Um kvöldið var boð Bjarkar og Sigur Rósar þekkst og mætt á tónleikana Náttúru. Víð náðum restinni af tónum Ólafar Arnalds en tónleikagestir voru rólegir og sátu flestir og hlýddu á.  Eftir 20 mínútna pásu komu snillingarnir í Sigur Rós og spiluðu í 100 mínútur. Þeir hófu tónleikana á gömlu góðu lögunum en svo komu þrjú lög af nýju plötunni, Með suð í eyrum við spilum endalaust, inn á milli. Nýju lögin koma vel út. Bassinn var áberandi og meiri stemming. Lagið með frumlega nafninu Gobbledigook er fínt stemmingalag og tóku áhorfendur vel undir með klappi. Það var gaman að heyra í söngvaranum Jónsa, en hann virkar allaf eins og hann sé mjög  feiminn þegar hann talar til áhorfenda.

Þegar Sigur Rósarmenn höfðu lokað dagskránni sinni með Popplaginu en það er magnað að sjá lúðrasveitamennina og strengjasveitina Amiinu enda lagið,  kom 50 mínútna pása vegna uppsetningar á sviði fyrir Björk. Það fjölgaði í Dalnum á meðan og var frægasta Íslendingnum vel tekið. Við hlustuðum á fyrstu lögin en Ari var orðinn þreyttur og kuldinn farinn að segja til sín, því kvöddum við Björk og voru þakklát fyrir góða stund.  Frábært framtak hjá listamönnunum. Vonandi verður hugarfarsbreyting hjá ráðamönnum í kjölfarið. Á leiðinni úr þvögunni gengum við yfir margar bjórdósir en ástandið hefði etv. verið betra ef tunnur hefðu verið í þvögunni.

Það má segja að Björk og Sigur Rós séu Bono og Geldof okkar Íslendinga, þau hafa göfugar hugsjónir og berjast fyrir þeim.

Útreiðarfélagið Gófaxi

Það var hressandi að hlusta á Bylgjuna í fallega veðrinu í morgun, tólf mínútur fyrir níu. Ég var úr karakter, keyrandi á RAV4 niður að sjónum að Sæbraut. Þá heyrist skyndilega í Bjössa Jóns, einn meðlima Útreiðafélagsins Glófaxa frá Hornafirði í þættinum Í bítið á Bylgjunni. Þetta var hið skemmtilegasta viðtal og endaði með hörku rokklagi en þeir Glófaxamenn eru að gefa út geisladisk.

Hér er tengill í viðtalið hressilega. - http://www.bylgjan.is/lisalib/getfile.aspx?itemid=35082

"Þetta er stór félagsskapur, við erum fjórir"!

Maður verður að eignast þennan disk.

Lokatónleikar hjá Skólahljómsveit Kópavogs

Hún er stórefnileg A-sveit Skólahljómsveitar Kópavogs. Ég fylgdist með lokatónleikum sveitarinnar á vertíðinni í morgun. Vorhátíð Kársnesskóla var haldin í dag og var leikur hljómsveitarinnar einn liðurinn í hátíðarhöldunum. Í gær spilaði sveitin í Snælandsskóla við góðar undirtektir. Það eru miklar framfarir hjá sveitinni. Nokkur góð rokklög voru spiluð í bland við lög úr Grease og vitanlega var  spiluð sólarsamba. Einnig var frumsamið lag, Rússíbaninn er einn hljómsveitarmeðlima samdi, Ástþór Bjarni heitir hann, og spilar á túbu.

Hér er Sæja saxafónn með launin sín.

 

Hér fylgir svo með myndband af byrjun lagsins "Í auga tígursins", sem rokkhljómsveitin Survivor gerði  frægt í kvikmyndinni, Rocky III.

". 

Pride (in the Name of Love)

Early morning, April 4
Shot rings out in the Memphis sky
Free at last, they took your life
They could not take your pride

Í morgun voru 40 ár liðin síðan eldhuginn Marteinn Luther King var ráðinn af dögum.

Hljómsveitin U2 samdi lag tileinkað blökkumannaleiðtoganum og heitir það Pride (in the Name of Love). Það hefur lengi verið uppáhaldslag mitt.  Bæði hefur krafturinn í laginu höfðað til mín og boðskapurinn sem tileinkaður er MLK.

Ég var svo heppin að komast á tónleika með U2 í júní 2005, hér er stutt myndband sem ég hannaði.

 

 

40 ár frá morðinu á King

Stórgóðir Sálartónleikar

Ég skellti mér á afmælistónleika með hljómsveitin Sálin hans Jóns í smekkfullri Laugardalshöllinni í gærkveldi. Það var mjög góð stemming og greinilegt að þeir Sálarmenn hafa lært margt á 20 árum. Stefán Hilmarsson stóð sig mjög vel og hljómsveitin var nokkuð þétt. Ég kannaðist við mörg andlit í Höllinni og hefur hinn dæmigerði afmælisgestur verið 42 ára.

Nokkrir öflugir tónlistarmenn spiluðu með Sálinni.  Jón sjálfur spilað í laginu Hey kanína sem varð fyrsti smellur sveitarinnar.  Gospellkórinn og nokkrir meðlimir Sinfóníuhljómsveitarinnar spiluðu undir.  Tónleikarnir enduð eftir góða tvo klukkutíma á kraftmiklu lagi, Sódóma.

Vel gekk að komast heim og voru tónleikagestir mjög ánægðir með kvöldið.

Mikil stemmning á afmælistónleikum Sálarinnar

U2 - The Joshua Tree and Desire

Tónlistamennirnir í U2 hafa ekki gert mikið  að því að kroppa fé af aðdáendum sínum með endurútgáfum á snilldarverkum sínum.  Fyrir þessi jól brugðu markaðsmennirnir þó á það ráð að endurútgefa meistaraverkið The Joshua Tree, tilefnið var 20 ár frá útgáfu frumburðarins sem markaði tímamót á ferli sveitarinnar. Gerði þá að stórstjörnum.

Afmælisútgáfan var í fjórum mismunandi möguleikum. Einfaldur diskur sem búið er að endurhljómjafna. Síðan viðhafnar- eða deluxeútgáfa með 14  aukalögum, vinyllplata og svo útgáfa í  takmörkuðu upplagi með mynddisk. Ég ákvað að versla síðasta útgáfuformið og sjá tónleika frá  París og heimildarmyndina Outside It's America enda er ég einlægur U2-aðdáandi.  Eða síðan ég eignaðist  Eldinn ógleymanlega árið 1984.

Þegar ég var í London  fyrir viku fór ég í eina stærstu margmiðlunarverslun heimsborgarinnar, HMV við Oxford stræti og ætlaði að kaupa eintak. Ekki fann ég neitt viðhafnarsett, aðeins diskaútgáfuna. Ég spurði hjálplegan afgreiðslumann með töff hár niður að hnésbótum um viðhafnarútgáfuna. Hann sagði að hún væri uppseld en ætlaði að athuga stöðuna á öðrum stöðum. Ég beið í 3 langar mínútur eftir niðurstöðunni. Loks birtist sá hárprúði, það eru til 19 eintök í HMV-búðinni við Oxford Circus. Við hlupum upp strætið því 19 eintök eru ekki lengi að hverfa í átta milljón manna borg. Loks fundum við búðina. Ekki var neitt viðhafnareintak að sjá en ég spurði hjálplega konu um eintökin 19. Hún hvarf niður á lager. Nokkru síðar kom hún upp með eintak. Mér létti stórum. Ég varð að eignanst þetta eintak. Ég spurði hve mörg væru eftir. Hún sagði að þetta hefði verið það næst síðasta!  Ég var ánægður að eignast næstsíðasta eintakið í heimsborginni, en sá eftir að hafa ekki keypt upp lagerinn! 

Ég er búinn að fara í gegnum tónleikana frá París og þeir eru góður. Mig langar alltaf að fara á tónleika með U2 þegar ég horfi á þá. Bono er mikill Ameríkusinni og platan Rattle and Hum er uppgjör á ferðalagi sveitarinnar um auðnir Ameríku. Sú plata kom ári á eftir Joshua trénu.

Ég hef haft Rattle and Hum plötuna í iPod-eyranu síðustu daga. Þar er lag sem er í miklu uppáhaldi hjá mér núna, Desire. Lagið er "burðarlagið" á skröltormaplötunni. Texti eftir Bono og lag eftir U2. Mér finnst mikill kraftur í Desire-laginu og uppörvandi að hafa á göngunni úr og í vinnu á myrkum desembermorgni eða kveldi.

 

Ba Ba Ti Ki Di Do

Þeir eru frumlegir drengirnir í hljómsveitinni Sigur Rós.  Eftir eftirminnilega útitónleika í Öxnadal á síðasta ári og kvikmyndina Heima er ég orðin mikill aðdáandi Sigur Rósar.   Þegar ég var í London náði ég að kíkja í eina stærstu tónlistarbúð heimsborgarinnar HMV.  Ég kíkti í S-rekkan og leitaði eftir því hvort þeir snillingar ættu hólf þar.  Jú, það stemmdi en diskurinn sem var í hólfinu koma mér einkennilega fyrir sjónir. Hann bar hvíta umgjörð, stafalaus.  Ég kíldi á eintak fyrir 8 pund.

Þegar diskurinn er opnaður kemur í ljós nafnið á honum, dulritað. BA BA TI KI DI DO.  Á stuttskífunni eru þrjú lög í lengri kantinum. Ósungin tónlist við nútímaballet  eftir Marce Cunningham, Split Sides, en  Radiohed tók þátt í verkinu.  Titilinn vísar til einu orðanna sem sögð eru í síðasta laginu "Di Do".

Ef öll lögin eru spiluð saman á sama tíma verður til nýtt lag.   Til þess að það gangi upp þarf ég fleiri CD-spilara!   En þessi diskur fer í safnið mitt, sveim (ambient) tónlistin er ekki að heilla mig við fyrstu hlustun.  

Platan fékk hins vegar fína sölu árið 2004 er hún kom út og fór í sjötta sæti bandaríska smáskífulistans. 

Lögin þrjú eru eftirfarandi: 

"Ba Ba" – 6:12
"Ti Ki" – 8:49
"Di Do" – 5:42

Undir London ganga jarðlestir og eru mikið af auglýsingaspjöldum hangandi á veggjum stoppustöðvanna. Ég sá eitt glæsilegt blálitað auglýsingaskilti með kvikmyndinni Heim eftir Sigur Rós.

Flottir suðrænir hausttónleikar hjá Skólahljómsveit Kópavogs

Við Særún vorum að koma af mjög vel heppnuðum suðrænum hausttónleikum hjá Skólahljómsveit Kópavogs.

Tónleikarnir voru haldnir í Fjölbrautarskólanum Flensborg í Hafnarfirði. Eftir smá leit í Firðinum fannst samkomustaðinn og var vel mætt í hátíðarsalinn. Flutt var skemmtilega tónlist af ýmsum toga, latin-dansar frá Suður-Ameríku, nautabanatónlist frá Spáni, hátíðarlög frá Afríku og einnig íslenska tónlist í tangóbúningi.

Fyrst steig A-sveitin á stokk og flutti fjögur lög og eftir verðskuldað uppklapp fluttu þau La bamba fyrir okkur. Særún stefnir að því að komast í A-sveitina í haust en hún spilar á altósaxófón.

B-sveitin lék einnig fjögur fjörug lög í grænu búningunum sínum og kom lagið Brazil feikna vel út hjá þeim. Nýr stjórnandi sveitarinnar er Helga Björg Arnardóttir. Eftir tvö ár í A-sveit komast nemendur í B-sveit. Síðan liggu leiðin í C-sveit.

C-sveitin var þétt og flutti sjö flott lög. Tekin voru sóló og trommur komu meira inn í lögin. Það var mikil spilagleði hjá krökkunum. Sveitin var vel klædd, í svörtum fötum með rauð bindi eða rós. Þetta var flott kvöldstund. Össur Geirsson og kennarar eru að gera góða hluti í Kópavogi.

Ár frá tónleikum Roger Waters

Í dag er ár frá tónleikum Roger Waters í Egilshöll. Um 15.000 manns mættu í Höllina í Grafarvogi á 7.000 bílum. Ég man eftir mikilli umferðateppu á Vesturlandsvegi og seinagangi við að rífa af miðum. Man eftir rútu á undan okkur. Man að strákarnir fóru út í kant að pissa. Man eftir þegar nær dró, þá fóru stelpurnar í rútunni niður af veg, bakvið lítinn runna til að pissa. 

Hinn 63 ára aldni Roger Waters var sprækur og spilaði á bassa í 11 manna hljómsveit. Byrjað var að krafti, sprengingar og stuð, svo hægði á. Beirútlagið kom á óvart. Eftirminnileg saga og flott myndmál.  Eftir hlé var Dark Site Of The Moon og Nick Mason bættist í hópinn. Tvö trommusett voru notuð. Flott sýning og mikill kraftur stundum kom gæsahúð á skrokk.  Þrjú lög af Veggnum í uppklapp. Tónleikum lokið klukkan ellefu og heimferð gekk vel.

Í göngu til vinnu í morgun verður Dark Site Of The Moon spilað í  iPod til að rifja upp meistaraverk.

Júni er mánuður Pink Floyd á Íslandi. Sínfónían og Dúndurfréttir ætla að vera með tónleika í lok mánaðarins í Háskólabíó. Ég verð fjarri góðu djammi, stefnan er sett á Humarhátíð á Hornafirði.