Egypsku faraóarnir lögðu ljónin ósigrandi

Egypsku faraóarnir (The Pharaohs) lögðu ljónin ósigrandi (Lions Indomptables) frá Kamerún í úrslitaleik Afríkukeppninnar fyrr í dag og vörðu titilinn. Þeir unnu verðskuldaðan 1-0 sigur með mkari Mohamed Aboutrika á Stade Omnisport að viðstödum 35.500 áhorfendum og unnu keppnina í sjötta skipti, oftast afrískra liða.

Egyptarnir tveir sem horfðu á leikinn með mér á Ölver fögnuðu látlaust en fyrr um daginn hafði staðurinn verið smekkfullur, leikur liðanna númer þrjú og sex í ensku úrvalsdeildinni  trekkti að.

Ég ætlaði að fylgjast vel með hinum hárprúða Alexandre Song, leikmanni Arsenal, í hjarta varnar Kamerún en Song söng sinn síðasta söng er stundarfjórðungur var liðinn leiks.  Hnéð hafði laskast en hárgreiðsla hans laskaðist ekki. Hann var eiginlega eins og egypskur faraói.  Frændi hans reynsluboltinn, Rigoberto  Song  fór í vörnina en þetta var sjöunda Afríkukeppni hans. Hann og Gunnar Ingi eiga það sameiginlegt að geta spila endalaust knattspyrnu.  Þrátt fyrir alla reynsluna hjá Song lenti hann í vandræðum á 76. mínútu og kostuðu þau sigurmark Faraóanna.

Leikmenn Kamerún eru þekktari knattspyrnumenn og leika margir með stórliðum í Evrópu en Egyptar hafa ekki komist eins langt en liðsheildin er góð hjá þeim.  Það er mikill mannauður í Afríku og ef álfan hefði betri stjórnmálamenn, fleiri Mandela, þá væri lífið þar auðveldara.

Gestgjafarnir, svörtu stjörnurnar frá Ghana lögðu fílana 4-2 í leik um bronsverðlaunin. 

Athugasemdir

[Gunnlaugur B Ólafsson, 10.2.2008 kl. 23:32]

Kæri Palli, á maður áð fara að þekkja allt um boltamá í Afríku? ! En ... fyrir sparkspekinga virðist hér góður pistill.

[Jón Halldór Guðmundsson, 11.2.2008 kl. 10:26]

Maður ætti eiginlega að pæla meira í Afríska boltanum en öðrum bolta. Þetta er besti boltinn í dag.

[Sigurpáll Ingibergsson, 11.2.2008 kl. 13:20]

Það er rétt,  úrslitaleikurinn var mjög góður. Hraður og mörg færi.  Liðin eru ekki alveg eins skipulögð og þau evrópsku og því meiri áhætta tekin.  Leikmenn lögðu mikið á sig og voru örþreyttir í leikslok.

Þetta var mun betri og skemmtilegri bolti en í leik Chelsea - Liverpool sem var á sama tíma.

[Jóhannes Einarsson, 12.2.2008 kl. 22:27]

Þú stendur þig vel á Afrikuvaktinni og skyggnist um eftir okkar mönnum. Synd og skömm að nefnan sú,:  íþróttarásin Sýn hafi  ekki sent út einn einasta leik frá þessari keppni. Það er kominn tími til að endurskoða áskriftina sína að sýninni sem gumar af ótal hliðarrásum sem senda út kyrrmyndir með Bylgju síbylju 98% vikunnar.