Hraðsveitakeppni Súgfirðingafélagsins

Í byrjun vikunnar tók ég þátt í Hraðsveitakeppni Súgfirðingafélagsins í brids. Það er gaman að spila hraðsveitakeppni með 7 sveitum. Skemmtilegt keppnisfyrirkomulag.  Ég var ráðinn í Bridgestone sveitina. Er hægt að hafa betra nafn á bridgesveit? Yfirleitt spila ég við Arngrím Þorgrímsson framkvæmdastjóra Betra grips sem flytur inn hina þekktu og vönduðu Bridgestone hjólbarða. En vetur konungur minnti á sig og það var vertíð í dekkjasölunni og því spilaði ég við gamlan spilafélaga Guðmund Guðjónsson.

Fyrsti snjór vetrarins og fyrsta hálka vetrarins var engin fyrirstaða fyrir Bridgestone-sveitina í Hraðsveitakeppni Súgfirðingafélagsins. Bridgstone-sveitin sem skipuð var Birni Guðbjörnssyni, Gunnari Ármannssyni, Guðmundi Guðjónssyni og Sigurpáli Ingibergssyni spólaði inn 515 stigum og var nokkuð fyrir ofan skipverjana á Val ÍS frá Súgandafirði.

Sjö efstu sætin í hraðsveitakeppninni skipuðu.
Bridgestone    515 stig
Valur  ÍS          449
Malir                438
Barðagrunn     431
Efribær            406
Neðribær         402
Gölturinn         383

Nöfnin á sveitunum eru skemmtilega valin hjá spilurum. Þau tengjast flest átthögunum fyrir vestan í Súgandafirði. Það var gaman að fylgjast með baráttunni milli Efribæ og Neðribæ en að lokum stóð efri bær ofar!
Næst verður spilaður fimm kvölda tvímenningur. Keppt um Súgfirðingaskálina í sjöunda skipti og hefst spilamennska kl. 18 á mánudaginn 19. nóvember.

Sigurpáll Ingibergsson, Gunnar Ármannsson, Björn Guðbjörnsson og Guðmundur Guðjónsson

Athugasemdir

[Þórbergur Torfason, 31.10.2007 kl. 22:54]

Kæri Sigurpáll. Hér með tilkynnist þér og þinni sveit að fyrstu helgina í apríl, verður haldið í annað sinn, minningarmót um Torfa föður okkar Halasystkyna í Þórbergssetri fyrstu helgina í apríl. Við byrjuðum á þessu sl. vetur og mættu spilarar frá Rvk. til og með Borgarfj. eystri. Við spiluðum sveitakeppni á laugardegi og tvímenning á sunnudegi. Þátttakendur voru að mig minnir 32. Þetta tókst með miklum ágætum og höfum við ákveðið að gera þetta að árlegum viðburði. Hátindur helgarinnar verður kvöldverður á laugardeginum, að hætti Torfa á Hala. Ég hafði ekki grun um að þú værir briddsari fyrr en akkúrat núna svo hér með geri ég þér þetta kunnugt. Að sjálfsögðu eru makar allir velkomnir, því fleiri því betra. Útbúin verður skemmtileg afþreying fyrir fylgdarlið sem ekki spilar. Vinsamlegast hugleiddu þetta og boðaðu fagnaðarerindið sem víðast. Við sefnum að tveggja daga móti og hér er nægt gistirými við vægu verði.

Kv.

[Sigurpáll Ingibergsson, 1.11.2007 kl. 22:56]

Sæll Þórbergur!

Mér líst mjög vel á þetta framtak ykkar og stefni að því að mæta. Ég spilaði oft í Suðursveit á þriðjudagskvöldum í Hrollaugsstöðum fyrir svona fimmtán árum.  Ég man sérstaklega eftir einu kvöldi. Við vorum með eina sveit frá Hornafirði á bridshátíð. Ég, Guðmundur Guðjónsson, Gunnar Páll Halldórsson og Guðbrandur Jóhannsson. Við spiluðum sveitakeppni á sunnudag og mánudag. Á þriðjudag keyrðum við austur og tókum þátt í Suðursveitabrids um kvöldið. Það var hápunkturinn.  Það var miklu skemmtilegra að spila við Torfa, Steinþórana tvo, Fjölni, Svövu Arnórs, Jón frá Jaðri, Jón frá Brunnavöllum, Gísla frá Brunnavöllum, Halldór, Ragnar í Garði, Björn frá Hestgerði, Bjössa frá Gerði og Bjarna Þórhallsson heldur en Zia Mahmod og félaga.

Ég boða fagnaðarerindið. 

[Þórbergur Torfason, 2.11.2007 kl. 22:22]

Gaman að heyra (sjá þetta komment Sigurpáll og takk fyrir. Þarna taldirðu upp helstu perlur Suðusveitar frá minni æsku. Veru í sambandi.