Blákollur (532 m)

Blákollur (532 m) er eitt af fjöllunum sem enginn tekur eftir á leið sinni eftir Suðurlandsveginum. Keyrt er af veginum þar sem klessubílarnir frá Umferðarráði standa uppi. Síðan er gengið eftir hraunjaðrinum til vesturs. Hraunið er mosavaxið og erfitt yfirferðar. Það var mikið af stórum krækiberjum í lyngi á leiðinni og tafði það göngumenn.

Þegar á Blákollstoppinn var komið þá var þoka komin á nokkra fjallstinda. Gamlir kunningjar nutu sín því ekki nógu vel, Sauðadalshnúkar og Ólafsskarðshnúkar eru í tindaröðinni. Vífilsfell í vestri og Lambafell í austri. Eldborgirnar í Svínahrauni voru flottar og hraunstraumarnir úr þeim sáust vel en þeir runnu árið 1000. Það glitti í Vestmannaeyjar og Geitafell með Heiðina háu tóku sig vel út. Virkjanirnar á Hellisheiði spúðu gufu og heyrðist hvinur frá þeim í kvöldkyrrðinni.

Við tókum stuttan hring og fylgdum hraunjaðri og komum inn á fyrri gönguleið. Ef fólk er ekki tímabundið þá er tilvalið að heimsækja Nyrðri Eldborgina og fylgja vegaslóða að þjóðvegi.

Dagsetning: 4. ágúst 2010
Hæð: 532 metrar
Hæð í göngubyrjun:  268 metrar, hjá klessubílum á Suðurlandsvegi.             
Uppgöngutími:  70 mín (19:00 - 20:10)  2.75 km.
Heildargöngutími: 140 mínútur  (19:00 - 21:20)
Erfiðleikastig: 1 skór
GPS-hnit tindur:  N: 64.02.114 - W: 21.29.563

Vegalengd:  6 km (1,8 km bein lína frá bíl að toppi)
Veður kl 21: 10,5 gráður,  7 m/s af NA og bjart, raki 95%
Þátttakendur: Útivistarræktin, 45 manns  - 15 bílar.                                                                     
GSM samband:  Já - gott samband
Gönguleiðalýsing: Létt og skemmtileg ganga á fjall sem fáir taka eftir. Aðkoman að Blákolli er skemmtileg, farið eftir hraunjaðri Svínahrauns að fjallsrótum. Gengið eftir hrygg sem gengur út úr því að NA-verðu. Létt og safarík gönguferð á ágústkvöldi.

Silfurfoss

Í 473 skrefa fjarlægð frá Hólaskjóli er nafnlaus foss í ánni Syðri-Ófæru. Hann minnir á Gullfoss, gæti verið frumgerð hans. Vegna líkingarinnar hafa sumir nefnt fossinn Silfurfoss.

Í gær keyrði ég frá Geirlandi hjá Kirkjubæjarklaustri og hélt upp Landmannaleið, F208. Það er stórmögnuð leið heim til Kópavogs. Margt fróðlegt bar fyrir augu og litadýrðin í nágrenni Landmannalauga var stórfengleg. Ég hef sé fjölda mynda en færustu atvinnuljósmyndarar hafa ekki náð að koma upplifuninni til skila. Veðrið var mjög heppilegt, nýlega hafði verið úrkoma og allir litir tærir.

Fyrsta stoppið var við Hólaskjól en þar reka aðlir í Skaftártungu ferðaþjónustu. Glæsilegur skáli er í Lambaskarðshólum, einnig góð tjaldstæði og smáhýsi.

Fjölskyldan fór í gönguferð að "Litla-Gullfossi" eða Silfurfossi í rigningarúða. Ég tjáði göngumönnum að þetta væri stutt ganga, 500 metrar eða fimm fótboltavellir. Ari litli vildi hafa fjarlægðina á tæru og taldi hvert skef sem hann tók. Var hann því frekar skreflangur alla leið. Taldi hann 473 skref.

  Fossinn í Syðri-Ófæru er á pöllum eins og Gullfoss og steypist ofan í þröngt gil

 

Mígandagróf

Það var glampandi sól og heitt í veðri þegar lagt var í ferð að náttúrufyrirbærinu Mígandagróf sem er í Lönguhlíð. 

Aðkoman að Mígandagróf er bílferð yfir Vatnsskarð. Eftir stuttan spotta er bílum lagt og tölt af stað í gönguna inn Fagradal og upp á Fagradalsmúla. Gangan er 1,5 km að rótum múlans. Síðan er brött og gróin hlíðin kjöguð. Þegar upp er komið sér inn Fagradal og falleg hraunelfa sem runnið hefur fyrir árþúsundi. Minnir hún á hraunið sem rann niður í Hrunagil og Hvannárgil af Fimmvörðuhálsi í vor. 

Eftir rúmlega tveggja tíma göngu í mosavöxnu landslagi í austurátt er komið að Mígandagróf sem lýst hefur verð sem sérstöku náttúrufyrirbæri sem helst má líkja við hringleikahús.

Göngumenn áttu von á meiri náttúrusmíð og voru flestir með Kerið í Grímsnesi sem viðmið. En vissulega er hægt að halda skemmtun þarna. Eflaust eru þetta eftirstöðvar af gömlum eldgíg og hefur vatn runnið niðu í hann og fyllt botninn. Grófin var vatnslaus. Því er hann með skemmtilegan grænan lit.

Þjóðsagan segir að tröllskessan í Kistufelli (Hvirfli) hafi verið á ferð niður háheiðina ofan Lönguhlíðar með stefnu á Kerlingargil að Hvaleyri til að verða sér út um hval. Í myrkri og þoku villtist hún af leið og kom fram á brún hlíðarinnar þar sem nú heitir Mígandagróf. Dvaldi hún þar til þoku létti. Er hún hélt af stað upplifði hún töfra næturkyrrðarinnar, tók hún sig því til og málaði listaverk á nálæga steina.

Einn göngumanna kannaðist vel við náttúrufyrirbærið. Hann fór oft til rjúpnaveiða á árunum 1975 til 1990 og náðist oft í fugl þarna en rjúpur halda yfirleitt hæð og flugu því í hringi og á endanum hafði veiðimaður sigur.

Á heimleið var tekinn góður útsýnishringur meðfram Lönguhlíð og sá vel til Helgafells, Húsfells og höfuðborgarinnar. Einnig sást Keilir bera af öðrum fjöllum í suðri.  Veðrið var frábært allan tíman og 13 gráðu hiti er heim var komið um miðnætti. Falleg byrjun á Jónsmessu.

Dagsetning: 23. júní 2010
Hæð: 492 metrar
Hæð í göngubyrjun:  168 metrar skammt frá Vatnsskarði.             
Uppgöngutími:  120 mín (19:10 - 21:10)
Heildargöngutími: 4,0 klst.  (19:10 - 23:10, 3 klst á ferð)
Erfiðleikastig: 2 skór
GPS-hnit gróf:  63.57.950 - 21.51.333                                                                                                            
Vegalengd:  10 km (4,2 km bein lína frá bíl að gróf)
Veður kl 21: 14,0 gráður,  3 m/s af NA og bjart, raki 67%
Þátttakendur: Útivistarræktin, rúmlega  70 manns  - 30 bílar.                                                                     
GSM samband:  Já - en ekki í lægð við Mígandagróf

Gönguleiðalýsing: Erfiðari ganga en búist var við. Gengið í 1,5 km að  fótum Fagradalsmúla. Þaðan er 200 metra hækkun. Mosi og laust grjót uppi á múlanum. Mígandagróf sést ekki og því er gott að hafa GPS tæki við höndina. Mígandagróf er sérstakt náttúrufyrirbæri sem helst má líkja við hringleikahús.

 

Heimildir:

Lönguhlíðarvarðarðan: http://ferlir.is/?id=8275

Langahlíð - Mígandagróf: http://ferlir.is/?id=4005

Útivist, útivistarræktin, www.utivist.is

Myndir eftir Arnbjörn Jóhannesson, frá 13. júní 2007

Myndir eftir Ingva Stígsson

Leggjabrjótur á Þjóðhátíðardaginn

Þjóðhátíð framundan og hvað gerir maður til að efla andann. Jú miðnæturganga með Útivist yfir Leggjabrjót frá Þingvöllum yfir í Botnsdal er tilvalin baráttuganga. Hápunkturinn er að drekka vatn úr Öxará og koma að upptökum árinnar úr Myrkavatni á miðnætti.

Við fórum aðeins útfyrir hefðbundna gönguleið og fylgdum Öxará að upptökum. Höfðum Búrfell og Botnssúlur á sitt hvora hönd megnið af leiðinni. Við upptök Öxarár var nýjum degi, þjóðhátíðardegi okkar, þeim 66 í röðinni fagnað. Einn göngumaður átti afmæli og ein hjón trúlofunarafmæli. Það var sungið þeim til hyllingar.

Öxar við ána
árdags í ljóma
upp rísi þjóðlið og skipist í sveit...  

Frá Myrkavatni var haldið upp á Leggjabrjót, niður að Biskupskeldu. Þaðan rennur lítill lækur og liggur yfir hann steinbrú. Er það líklega eitt fyrsta vegamannvirki landsins. Þegar komið var fram hjá Sandvatni var aftur farið af gönguleið og gengið á Djúpadalsborgir en þar sást hvernig Sandvatn rennur niður í Djúpadal sem markar upphaf Bryjnudals.  Niðurleiðin niður í Botnsdal tók á þreytt hnén og skrúðugur Botsdalur tók fallega á móti okkur.

Dagsetning: 16 til 17. júní 2010
Hæð: Um 500 m, hæst á Leggjabrjóti
Hæð í göngubyrjun:  154 metrar skammt frá Biskupsbrekkum hjá Svartagili            
Heildargöngutími: 6,25 klst.  (21:30 - 03:45)
Erfiðleikastig: 1 skór
GPS-hnit Sandvatn: N: 64.20.33.63 W: 21.13.13.81                                                                                                            
Vegalengd:  18,9 km (12,8 km bein lína frá rútum að Stóra Botni)
Veður kl 21: 6.0 gráður,  10 m/s af SA og bjart, raki 84%
Þátttakendur: Útivist og Skál(m), 106 manns  - 2 rútur frá Sæmundi.                                                               
GSM samband:  Já

Gönguleiðalýsing: Létt næturganga yfir forna þjóðleið. Komið við hjá Myrkavatni, upptökum Öxarár og farið niður að Djúpadalsborgum en þessi hliðarspor eru utan hefðbundnar gönguleiðar.

 

Göngufólk við upptök Öxarár við Myrkavatn á miðnætti.

 

Varúð – Heimsmeistarakeppni framundan

„Það hefur ekki sést kjaftur hérna eftir að heimsmeistarakeppnin hófst.“  - Svo mælti einn svartsýnn ferðaþjónustuaðili í afþreyingu HM-árið 1994. Hann bölvaði um leið þessari vinsælu íþrótt og fann henni flest til foráttu og var einn meira pirraður út í að ferðafólk skyldi skipuleggja ferðalög sín í kringum sjónvarpsgláp yfir keppnina.

Ég var á þessum árum starfsmaður hjá Jöklaferðum  á Hornafirði og merktum við samdrátt í bókunum en vorum bjartsýnir á að lausaumferð myndi taka kipp eftir síðasta flaut. Það gekk eftir.

Ég fór því í rannsóknir og skoðaði tölur yfir þetta tímabil á DataMarket.com. Ekki er hægt að greina samdrátt í fjölda ferðamanna á HM eða EM ári en eflaust færist kúrfan til. Ferðamenn spretta upp eins og gorkúlur þegar keppninni lýkur.   Því má fólk í ferðaþjónustu ekki fara á taugum þó lok júní og byrjun júlí verði ekki eins góð sama tímabil 2009.

Taflan sýnir ferðamenn á síðasta áratugi síðustu aldar og breytingu á milli ára.

Ár	Fjöldi	Br.  %
1990	141.718	8.6
1991	141.413	1.2
1992	142.561	-0.6
1993	151.728	6.4
1994	169.504	11.7
1995	177.961	5.0
1996	195.669	10.0
1997	201.655	3.1
1998	232.219	15.2
1999	262.605	13.1

 

Heimsmeistaraárin 1990, 1994 og 1998 koma vel út í heildina. Olympíu- og Evrópumeistaraárið 1992, þegar Danir sigruðu eftirminnilega er eina samdráttarárið. 

Í Morgunblaðinu var gerð úttekt á tjaldstæðum í sunnudagblaðinu þann 23. ágúst, 1998.

„Kristján [Sigfússon] segir að aðsókn að tjaldstæðinu í Laugardal hafi ekki glæðst fyrr en heimsmeistarakeppninni í knattspyrnu í Frakklandi lauk. "Það var lítið af fólki í júní og byrjun júlí en svo gjörbreyttist aðsóknin í kringum 10. júlí og hélst í hámarki þar til um síðustu helgi. Á heildina litið er aðsóknin hins vegar minni en í fyrra," segir hann.“

Eftir  17% fækkun ferðamanna í apríl og 15% í maí vegna eldgos í Eyjafjallajökli, þá kemur HM2010. Þetta er smá bræla hjá ferðaþjónustunni en það mun birta til. Fólk kemur til að upplifa fegurðina og sjá kraftinn í náttúrinni.

Nú er hlé á gosi í Eyjafjallajökli og átakið Inspired By Iceland í hármarki. Sóknin fer að skila árangri strax eftir HM.

 

Heimildir:

DataMarket.com úr gagnagrunni Hagstofunnar.

Morgunblaðið, gagnasafn, 23. ágúst 1998

Milljón skoðað vefmyndavélar

Ólafsskarðshnúkar (560 m og 620 m)

Fyrsta gangan með Útivistarræktinni var gengin í góðviðrinu á miðvikudagskvöld. Stefnan var sett á Ólafsskarðshnúka en þeir eru í framhaldi af Sauðadalahnúkum og loka hnúkarnir austurhlið Jósefsdal.

Gengið var inn Jósefsdal og upp skarðið milli Vífilsfells og Sauðadalsnjúka. Mótorhjólabrautir voru merktar víða í dalnum og virtu hjólamenn þær. En fáir hjólamenn voru við æfingar. Stefnan var sett á hnúkana og gengið upp milli þeirra. Laus möl var ofan á móberginu og þurfti því að fara varlega. Þegar komið var á topp neðri hnúksins var hugað að nesti. Gott útsýni yfir Suðurland en ekki sást Eyjafjallajökuls vegna misturs. Það var mosi á toppnum en ekki var haldið á hærri hnúkinn sem er 60 metrum hærri.

Ólafsskarð sem gefur hnúkunum nafn er gölum þjóðleið úr Selvoginum. Nær hún hæst 420 metrum. Nafnið á skarðinu er komið af Ólafi bryta í Skálholti, sem hér átti leið um trylltur af töfrum ráðskonunnar á staðnum, eins og frá er greint í Þjóðsögum Jóns Árnasonar.

Í Ólafsskarði eru leyfar af gömlum skíðaskála Ármanns. Hafa Reykvíkingar sótt sælustundir þangað áður en skíðaaðstaða kom í Skálafell og Bláfjöll.

Dagsetning: 26. maí 2010
Hæð: 562 metrar
Hæð í göngubyrjun:  273 metrar skammt frá minni Jósefsdals.             
Uppgöngutími:  75 mín (19:10 - 20:25)
Heildargöngutími: 2,5 klst.  (19:15 - 21:40)
Erfiðleikastig: 1 skór
GPS-hnit tindur:  64.01.285 - 21.32.737                                                                                                            
Vegalengd:  7 km (2,5 km bein lína frá bíl að toppi)
Veður kl 21: 8.9 gráður,  7 m/s af N og bjart, raki 55%
Þátttakendur: Útivistarræktin, 47 manns  - 13 bílar.                                                                     
GSM samband:  Já - en í aðra áttina

Gönguleiðalýsing: Létt ganga upp skarð inn Jósefsdal  í ríki mjótorhjólanna. Gengið með Sauðadalahnúkum að Ólafsskarðshnúkum. Kjagað upp móbergishlíðina milli hnúkana. Nestispása á mosavöxnum toppi. Horft til hærri hnúksins. Komið niður í Ólafsskarði.

 

Gosstöðvar af Morinsheiði

Svona litu gosstöðvarnar á út kl. 19.00 frá Morinsheiði, föstudaginn langa, 2. apríl. Svartir hrauntaumar renna beggja vegna Bröttufannarfells og mynduðu einstaka hraunfossa. Ekkert hraunrennsli var í gilin, Hrunagil og Hvannárgil.

Þegar skygga tók, tókur gosstöðvarar á sig allt aðra mynd. Þá sást eldbjarminn bakvið fellið. 

Stórmagnaður föstudagurinn langi

Það var stórmögnuð páskastemming í gær, föstudaginn langa í Þórsmörk, skógi Þórs. Stanslaus umferð göngumanna frá Básum upp á Morinsheiði en þar var leiðinni lokað við Heljarkamb.  Rúmlega sex kílómetra langur ormur. Sumir kölluðu jarðeldagönguna á Morinsheiði, píslargöngu.

Aðstæður í hrikalegri náttúrusmíð voru ágætar en undir kvöld var komin hálka í einstaka staði á stígum og undir snjó orsakaði greinilega óhöpp.

Það var stórfenglegt að sjá stanslausa röð göngumanna upp Foldir að Morinsheiði en þetta er um tvær Hallgrímskirkjur í hækkun. Ekki sáust neinir hraunfossar enda eldstöðin að endurbyggja sig. Ekki heyrðust drunur frá jarðeldunum en þyrlur sáu um að magna hljóðið í kyrðinni. Margir komu þegar skyggja tók en þá var mikið sjónarspil. Eldurinn í gosinu sást mun betur og að ganga framhjá Útigönguhöfða með rauðan bjarma baksvið var einstök upplifun. Á leið úr Þórsmörkinni rétt fyrir miðnætti sást eitt mesta sjónarspil sem ég hef séð og hafa margar kvikmyndir runnið í gengum augun. Þá sást eftir Hvanngili í skarði sem kom í svart landslagið til gosstöðvanna. Það var ólýsanleg sýn.

Í myrkrinu sást einnig að fólk fór ótroðnari slóðir, lýsing af höfuðljósum sást um allt Goðaland og Þórsmörk. Venus, lágt á himni rímaði vel við göngustjörnunar.

Mér fannst vel af sér vikið að ekki skyldu verða meiri slys á fólki, rétt eins og í einum knattspyrnuleik. Gæsla var góð hjá björgunarsveitamönnum og lögreglu. Vakti það öryggistilfinningu göngumanna.

Það má ekki ræna fólki þessari upplifun með lokunum. Því má ekki loka svæðum. Þetta er hluti af því að vera Íslendingur, að fá að upplifa jarðelda í stórbrotinni náttúru.

Frá kl. 15 til 22 og jafnvel lengur var stanslaus umferð upp og niður Morinsheiði. Heiðarhorn skagar framúr.

 

Slasað fólk sótt í Þórsmörk

Gengið niður Bröttufönn

Það er tignarlegt að ganga niður Bröttufönn.  Stórbrotið útsýni yfir Þórsmörk, Heljarkamb, Morinsheiði, Heiðarhorn og Rjúpnafell.

Það hefur verið magnað fyrir ferðamenn í dag að hafa tvö glóandi hraun á báða vængi og nýja sjóðheita sprungu fyrir ofan sig.

Þessi mynd var tekin 23. júní 2007 um dagmál.

Fólki vísað af Bröttufönn

Myndakvöld Ferðafélags Íslands

Það var húsfyllir á myndakvöldi FÍ í gærkveldi. Atvinnuljósmyndararnir Christopher Lund og Haukur Snorrason fóru á kostum. En þeir hafa getið sér gott orð fyrir landslagsmyndir.

Christopher Lund hóf kvöldið eftirminnilega með spurningunni, Hvað er flott landslagsmynd? Hann sýndi nokkrar frábærar myndir og var birtan lykilatriðið í myndunum ásamt stórbrotnu landslagi. Fólk er einnig æskilegt í landslagsmyndum, þá sjást stærðarhlutföll.  Eftir að hafa sýnt nokkrar myndir  og velt upp spurningunni um góða landslagsmynd, fórum við í ferðalag með Chris til Langasjávar.  Ég var svo heppinn að vera í ferðinni, Fegurðin við Langasjó í sumar. Það var gaman að endurupplifa ferðalagið. Christopher Lund er með vefinn www.chris.is og eru þar nokkrar af landslagsmyndum sem sýndar voru. Ég mæli einnig með myndasyrpu Chris. Hún er "awesome", eins og einn erlendur vinnufélagi minn lýsti henni.

Haukur Snorrason sýndi loftmyndir. Hann er íhaldssamari en Chris. Tekur loftmyndir úr sömu flugvél, með sömu myndavél og Fuji Velvia 50 filmu. Það voru mörg ný og skemmtileg sjónarhorn hjá Hauki af þekktum og óþekktum stöðum.

Mér finnst ég alltaf svo ríkur eftir myndakvöld FÍ.