Hop jökla

Þær eru áhrifamiklar myndirnar hjá Ragnari Th. Sigurðssyni af Jökulsárlóninu. Það fer ekki á milli mála að miklar breytingar eru á Lóninu og brátt verður þa' hinn dýpsti fjörður.  Einar Björn, staðarhaldari á Jökulsárlóni, nær kannski að bjóða ferðir inn að Esjufjöllum áður en hann kemst á eftirlaun.

Þær eru einnig mjög greinilegar breytingarnar á Gígjökli eða Falljökli í Eyjafjallajökli. Þær er ekki eins góðar og hjá RTH en segja sína sögu um áhrif hlýnunar á jökulinn. Fyrri myndin var tekin árið 2001 og síðari í lok júlí 2009.

 

Jökulsporðurinn teygir sig langt fram í Lónið. Mynd tekin 2. júní 2001. Þrem árum fyrr (1998) var skriðjökullin upp fyrir kambinn alla leið niður.

 

 Þann 28. júlí 2009 nær tungan varla niður í Lónið og það sér í nýtt berg.

Myndröð af bráðnuninni

Athugasemdir

[Gunnar Th. Gunnarsson, 12.8.2009 kl. 01:16]

Þetta er sláandi munur

[Guðrún (IP-tala skráð) 12.8.2009 kl. 01:36]

Hop og skrið skriðjökla er áhugavert og umhverfið sunnan Vatnajökuls mjög að breytast, t.d. hafa nokkrir skriðjöklanna þar skriðið allt að 100 m undir sjávarborð. En það er þessi setning: "Einar Björn, staðarhaldari á Jökulsárlóni" sem vakti mesta athygli mína. Staðarhaldari er umsjónarmaður kirkju- eða klausturjarða.

[Loftslag.is, 12.8.2009 kl. 08:00]

Magnað.

[Sigurpáll Ingibergsson, 12.8.2009 kl. 12:25]

Guðrún:  Það er eflaust rétt, orðið staðarhaldari hefur eflaust verið notað fyrir umsjónarmenn kirkju- eða klausturjarða. Hins vegar hefur merkin þess færst út og oft notað yfir umsjónarmenn í öðrum störfum.  T.d. kalla Sauðkræklingar umsjónarmann skíðasvæðisins í Tindastól, staðarhaldara. Háskólasetur Suðurnesja hefur notað þetta heiti fyrir umsjónarmann sýningarinnar um ævi og starf  Jean-Baptiste Charcot í sýningunni Heimskautin heilla.  Hornfirðingar hafa einnig nefnt Einar Björn, staðarhaldara á Jökulsárlóni.

Viðar:  Það er rétt, Klofajökull er hið forna heiti yfir Vatnajökul. Til eru óljósar frásagnir af reglulegum ferðum bænda norður og suður yfir jökulinn.

[Sveinn Atli Gunnarsson, 12.8.2009 kl. 12:45]

Mikill munur á ekki lengri tíma.

[Alli, 12.8.2009 kl. 13:19]

Sæll Palli.

Víst eru myndirnar stórkostlegar, en þær eru ekki allar frá Jökulsárlóni.  Mynd nr. 18 er t.d. úr Norðurdal í Skaftafellsfjöllum og má m.a. sjá Súlutinda og Lómagnúp.  Ég held að mynd nr. 12 sé þaðan líka.

[Emil Hannes Valgeirsson, 12.8.2009 kl. 17:29]

Ég man að í skólaferðalagi árið 1980 fórum við nokkrir út á Gígjökul beint af sandöldunni lengst til vinstri á eldri myndinni, við lítinn fögnuð kennara.

Myndröðin frá Ragnari Th. er ekki alveg öll frá Breiðamerkurlóni eins og Alli nefnir. Myndir 12 og 18 eru væntanlega af Skaftafellsjökli, Bretarnir bara eitthvað að rugla þar.