Lokum Straumsvík

Það var gaman að heyra í Gísla Hjálmtýssyni í Silfri Egils í hádeginu. Þar fór hann yfir athyglisverða grein sem hann skrifaði í Fréttablaðið í byrjun febrúar, Virkjum ódýrt - lokum Straumsvík.

Þetta er djarft en þarft útspil hjá Gísla svona rétt fyrir fyrirhugaða stækkunarkosningu hjá Alcan. Rökin er góð. Skelfilegt að fá aðeins 2 sent fyrir kílóvattstundina í stað 6-7 senta sem gætu fengist með því að breyta álverinu í miðstöð nýsköpunar fyrir orkutengda starfsemi. 

Það er laukrétt sem kom fram í viðtalinu í Silfrinu að virkjun og bygging álvers fyrir nær hálfri öld var nauðsynleg og góð ákvörðun fyrir Ísland en í dag eru stórvirkjanir fyrir álbræðslur stórkostleg tímaskekkja. Það er margt sem álverið í Straumsvík hefur gert gott. Til dæmis frumherjar í gæðamálum og verið í forystu í þeim málum hér á landi.

Ef áform um álver standa. Nýtt álver í Helguvík. Nýtt álver á Bakka og stækkun í Hafnarfirði, þá verður næsta kreppa sem við göngum í gengum álkreppa!

Athugasemdir

[Tryggvi L. Skjaldarson, 15.2.2010 kl. 22:35]

Ætlaði að fara að tjá mig um þessa hugmynd sem virðist falla í góðan jarðveg hjá þér og einhverjum fleirum. En mér fallast hendur.  Velti fyrir mér hversu neðarlega við þurfum að fara áður en umræðan fer að fjalla um uppbyggingu í stað niðurrifs.

[Guðlaugur (IP-tala skráð) 16.2.2010 kl. 11:05]

Ég skil ekki af hverju Gísli vildi endilega rífa álverið til að byggja eitthvað annað í staðin.  Það er nægjanlegt pláss í Straumsvík fyrir alls konar starfssemi og álverið útlokar ekkert.  Það er hreinlega gert ráð fyrir því í skipulagi.  Gísli ætti að gera eitthvað þarfara en að bulla í beinni og fara með tómar rangfærslur.