Stiki, eina íslenska fyrirtækið á CeBit?

Í frétt í Viðskiptablaðinu og vb.is verður aðeins eitt íslenskt upplýsingafyrirtæki á stærstu tölvusýningu Evrópu, CeBit. Það er Stiki ehf sem selur m.a. búnað á sviði upplýsingaöryggis.

 Í fréttinni á vb.is kemur fram: "Að sögn Svönu Helenu Björnsdóttur, framkvæmdastjóra Stika, eru þau þegar búin að bóka fjöldann allan af fundum við samstarfsaðila, viðskiptavini og fleiri sem áhuga hafa á hugbúnaði Stika RM Studio."

RM Studio áhættumatshugbúnaðurinn er ætlað fyrirtækjum, stofnunum og sveitarfélögum sem vilja tryggja öryggi í vinnslu upplýsinga. Byggt er á aðferðafræði öryggisstaðlanna ISO/IEC 27001:2005, ISO/IEC 27002:2005 og ISO/IEC 27005:2008.

Það eru slæm tíðindi að áhugi eða bolmagn íslenskra upplýsingafyrirtækja sé ekki meira. En þarna er klárlega tækifæri fyrir Nýja Ísland. 

Færri á CeBIT

Svona gerast kaupin á Hesteyrinni!

Vona ég að rannsóknablaðamenn fjalli um Eignarhaldsfélagið Hesteyri ehf  og gefi lesendum sínum nánari upplýsingar um þetta athyglisverða félag en það hefur tölt mjög hljóðlega um markaðinn.  

Eindarhaldsfélagið Hesteyri var stofnað árið 1989 og var tilgangur félagsins þá: Leiga atvinnuhúsnæðis. Síðan hefur verið mörkuð ný stefna eftir 21. nóvember 2002 og félagið komið í rekstur og starfsemi eignarhaldsfélaga. Hættir í leiguharkinu.

Í Frjálsri verslun um haustið 2002 er athyglisverð úttekt á Hesteyri og ber greinin nafnið: “Hófadynur Hesteyrar”.   En þar er flóknum kapli eiganda lýst. Var eignarhaldsfélagið Hesteyri ehf, lykilfélag í kaupum S-hópsins á Búnaðarbanka Íslands.   Komu þar við sögu félög sem heita Ker, S-hópur, Straumur, Norvik (móðurfélag BYKO), VÍS  og auk Hesteyrar sem flækja svo málið í valdabaráttu milli tveggja Framsóknarkónga,  Þórólfs Gíslasonar og Ólafs Ólafssonar.

Í lok greinarinnar í Frjáls verslun stendur:

“Það verður að að segjast eins og er að þetta er ein mesta leikflétta í íslenskum viðskiptum í áraraðir og verðskuldar Þórólfur Gíslason sannarlega athygli fyrir vikið. Gleymum ekki þætti
Hornfirðingana í þessu máli, þeir eiga Hesteyri með Skagfirðingum.” 

Ekkert jafnræði hluthafa VÍS

Hugleiðingar Um Verðtryggingu.

Ég fékk um daginn bréf í hendurnar skammt frá Ráðherrabústaðnum. Hann var ekki lokaður vegna aðgerðaleysis.  Þar voru slagorð gegn verðtryggingu en verðtrygging á lán er tímaskekkja.

Verðtrygging = Tryggir Gjaldþrot Heimila.
Verðtrygging = Krabbamein Íslensk Fjármálakerfis.
Verðtrygging = Allir Tapa á Endanum.
Verðtrygging = Virkar Bara á Skuldara.
Verðtrygging = Stóraukna Erlendar Lántökur.
Verðtrygging = Er Hötuð.
Verðtrygging = Aukið Álag á Krónu.
Verðtrygging = Böl Lántakenda.
Verðtrygging = Er Einstakt Íslenskt Fyrirbrigði
Verðtrygging = Hverjir Græða?
Verðtrygging = Er það Það sem Við Viljum
Verðtrygging = Eykur Á Verðbólgu
Verðtrygging = Hluti Þjóðar er Skítsama Um Verðbólgu.
Verðtrygging = Tryggir Hækkanir á Vörum.
Verðtrygging = Bull og Vitleysa.
Verðtrygging = Verndum Auðvaldið.
Verðtrygging = Þjóðarskömm.
Verðtrygging = Er bara Vilji Stjórnmálamanna og Auðmanna.
Verðtrygging = Þjóðarböl.

Burt Með Þessa Verðtryggingu Hún Þjónar Ekki Þjóð Sinni.

Útgefendur: Afkvæmi Forfeðra og Formæðra.

Það er margt til í þessum slagorðum. Verðtrygging var sett á lán í apríl 1979  með svokölluðum Ólafslögum. 

Ingólfur H. Ingólfsson  sem rekur ásamt konu sinni vefinn spara.is hefur tjáð sig vel um verðbætur. Hann sendir reglulega fréttabréf og hér er upphafið af síðasta bréfi.

Afnám verðtryggingar
- rétti tíminn er núna!

Þeim fjölgar stöðugt hagfræðingunum sem telja rétt að afnema beri verðtryggingu lána - þetta séríslenska fyrirbæri. Verðtrygging er óhagstæð lántakendum og ósanngjörn þar sem þeir bera einir áhættuna af verðlagsbreytingum og verðtrygging dregur úr áhrifum peningamálastefnu Seðlabankans.

Rétti tíminn til þess að afnema verðtryggingu á lánum til almennings er einmitt núna þegar stokka þarf upp í fjármálakerfi þjóðarinnar. Það sem vekur hins vegar undrun mína er hik og vandræðagangur margra sérfræðinga og stjórnmálamann sem telja málið flókið og erfitt viðureignar. Það beri einnig að verja sparnað landsmanna og það sé best gert með verðtryggingu.

 

Dofinn

Maður er hálf dofinn eftir ævintýri dagsins. Var að vona að botninum væri náð síðasta mánudag, en jökulsprungan er dýpri en maður hélt. Vonum að hún sé V-laga. Næsti mánudagur verður betri.

Heyrði þetta spakmæli, sem upphaflega er ættað úr Hávamálum en hefur þróast á góðum stað í dag.

"Margur verður að aurum api og af seðlum górilla."

Haustráðstefna Skýrr

Gærdagurinn fór í fróðlega og skemmtilega Haustráðstefnu Skýrr. Metþátttaka var, liðlega 400 ráðstefnugestir skráðu sig.  Fyrirlestralínurnar voru fimm og valdi ég öryggislausnalínuna. Maður þarf að halda sér vel við í þessum geira. Annars dagar maður uppi sem náttröll.

Ráðstefnan hófst á athyglisverðri inngangsræðu Dr. Trausta Kristjánssonar en hann er þróunarstjóri talgreiningar hjá Google. Hann greindi frá verkefnum sínum og síðan frjóu vinnuumhverfi, Wiki-veröldinni.  Hún byggist á sjálfskipulagi og leitar fólk sjálft upp verkefni. Allt er opið nema laun og kótinn að PageRank leitinni. Allir starfsmenn hluthafar. Afrekalisti starfsmanna, Q-markmið og vikuleg verk eru sýnileg í Wiki og 20% tími í önnur verk er athyglisverð nýbreytni. Google er þekkt fyrir að bera fram góðan mat fyrir starfsfólk og hefur það verið markmið síðan fyrirtækið komst úr bílskúrnum. Vinna menn á þessum vinnustað var ein spurning úr sal. Vakti erindi Trausta mikla athygli ráðstefnugesta.

Síðan skiptist ráðstefnan upp eftir fyrirlestrarlínum. Í öryggislausnum var sagt frá rafrænum undirskriftum á bankakortum en innleiðing á því verkefni hefur staðið yfir síðastliðin þrjú ár. Síðan komu þrír fyrirlestrar þar sem fyrirtæki kynntu lausnir sínar.  Rod crook frá Ascertia sagði frá rafrænum undirskrifum á vef. William Manon frá Safe Net kynnti lausnir að dulkóðaðri öryggisafritun fyrir gagnagrunna. Daniel Hjort frá HID kynnti örugg starfsmannakort. Síðan komu Ágúst Sturla Jónsson frá Securitas og Ebenezer Þ. Böðvarsson frá Skýrr með fyrirlestra um raunlægt öryggi og  hvernig hægt sé að afhjúpa trúnaðargögn. Voru þessi fyrirlestar fín upprifjun á öryggsmálum.

Síðari inngangsræðan var einnig athyglisverð. Fyrirlestur Marcus Murray bar yfirskriftina Live Hacking. Marcus er eini Svíinn sem ber titilinn Microsoft Security MVP, sem stendur fyrir Microsoft Valued Professional. Hann er vinsæll fyrirlesari á heimsvísu, sem hefur sérhæft sig í öryggislausnum fyrir Microsoft-umhverfið með áherslu á öryggisúttektir og varnir gegn árásum.   

Hann sýndi ráðstefnugestum hvernig hægt er að koma Trójuhest inn á veikasta hlekk fyrirtækis, útstöð starfsmanns, framhjá öllum eldveggjum. Síðan notaði hann forritið Core Impact til að stjórna tölvu notanda og ná völdum innra neti fyrirtækisins. Það fór óhugur um fundarmenn, þetta var svo einfalt þegar Trójuhesturinn var kominn inn fyrir varnirnar.   Síðar um daginn hélt hann fyrirlestur um hvernig Microsoft hefur brugðist við hættunni og aukið öryggið. Niðurstaðan var sú að fyrirtæki eiga að skipta sem fyrst í Windows Vista Enterprise stýrikerfi og uppfæra í Windows 2008 þjóna.

Það má segja að ráðstefnan hafi tekist vel. Allir ráðstefnugestir eiga að hafa stækkað þekkingarbrunninn sinn. Það gengur vel hjá þekkingariðnaðinum í kreppunni, gengisþróun hagstæð fyrir útflutning og fyrirtæki ná að manna sig.  Umgjörðin á Hótel Nordica er flott en fyrirlestrarsalirnir eru klénir. Óþægilegir stólar á flötum gólfum. Mér finnst alltaf best að vera í kvikmyndasölum á ráðstefnum.

Veiðiaðferðir

Í Fiskifréttum í Viðskiptablaðinu í dag er viðtal við kapteininn og Hornfirðinginn, Ómar Fransson á línu- og  handfærabátnum Sævari SF 272. Hann segir frá makrílveiðum á handfæri. Með fréttinni fylgir mynd af bátum og eru handfærarúllurnar á mjög óhefðbundnum stað á bátnum. Þarna er verið að vinna merkiegt þróunarstarf.

Þessi frétt minnir mig á fund hjá Fiskifélagi Íslands um þróun veiðarfæra og umgengni við auðlindina, sem ég sótti í desember 2001.  Ég skrifaði pistil um fundarreynslu mína á horn.is og fylgir hann hér á eftir, en það er greinilegt að hornfirskir sjómenn eru að þróa vistvænar og umhverfisvænar makrílveiðar. Athyglisverð nýsköpun.

Veiðiaðferðir 

Í byrjun desember á síðasta ári mætti ég á fund hjá Fiskifélagi Íslands um þróun veiðarfæra og umgengni um auðlindina.  Ég hef haft mikinn áhuga á þessu efni, veiðafæratækni,  en þegar ég var togarasjómaður fyrir 15 árum vorkenndi ég fiskinum í sjónum, þurfa að glíma við þessa hrikalegu náttúruhamfarir, hlera og troll.

Einar Hreinsson hjá Netagerð Vestfjarða og Guðmundur Gunnarsson hjá Hampiðjunni héldu mjög fróðleg erindi. Spurt var hvort veiðarfærin geti valið þann fisk sem menn vilja veiða og þannig flokkað fiskinn niðri í sjónum í stað þess að flokka hann uppi á yfirborðinu

Vestfirðingurinn, Einar hristi nokkuð upp í fundarmönnum og sagði að vitneskja fiskimanna á veiðiferlinu vera afar takmarkaða, að því leyti að mjög lítið væri vitað um hvað gerist neðansjávar við fiskveiðar og að kunnátta og geta Íslendinga í fiskveiðum væri einfaldlega ekki nógu góð.
Þessi orð hans vöktu mikla athygli og ekki síst hjá skipstjórunum. Ég hef verið alinn upp í þeirri trú að við eigum besta fiskveiðistjórnunarkerfi í heimi og með mestu kunnáttu í fiskveiðum. Mér leið þarna eins og á Júróvisionkvöldi, með besta lagið að okkar mati en ekkert stig.

Ennfremur vakti mikla athygli hjá mér tafla (e. Fridman og Carrothers) sem Einar sýndi um hvernig við veiðum fisk, en þar eru 75 “mögulegar” veiðiaðferðir, notaðar eru 18 í heiminum, en við Íslendingar notumst við þrjár. Veiðiaðferðir okkar eru því fáar og einhæfar.
Taflan byggist á tveim þáttum, atferli fisks og veiðiaðferðum. Áhrifum beitt á atferli, 1)aðlöðun, 2)fráhrinding og 3)blekking. Svo eru aðferðir við að ná fiski úr vatni, a)ánetjun, b)innilokun, c)sigtun, d)kræking/stunga og e)dæling/plæing. 
Hvatti Einar ennfremur til að menn myndu þróa nýjar veiðiaðferðir og tæknigetu með opnum hug og hugsa málið frá öðru sjónarhorni, aðferðir sem við værum að nota í dag, væru kannski ekki þær bestu jafnvel ónothæfar. Fannst mér þessi ábending hans góð og sérstaklega athyglisvert að heyra þetta frá manni úr veiðarfærabransanum.

Guðmundur greindi í erindi sínu m.a. frá rannsóknum Norðmanna í veiðarfærarannsóknum en þeir eru langfremstir í heiminum í þessum efnum. Sagði frá tilraunum með að nýta lyktarskyn fisks til að veiða hann, sem og með lífræn hljóð.

Mín niðurstaða eftir fundinn var sú að það þarf að taka rannsóknir á atferli og erfðum fiska, lífríki og fiskstofnum til rækilegrar endurskoðunar. Stórefla þarf rannsóknir, byggja upp meiri þekkingu og tæknigetu,  setja landgrunnið í umhverfismat og skilgreina alveg upp á nýtt með hvaða veiðarfærum fiskurinn er veiddur. Fara eftir niðurstöðum þó kvalarfullar kunni að verða. Stefna að því að bera af á þessu sviði og selja svo rannsóknarþekkingu út um allan heim. Vísindin efla alla dáð.                                                                                                                                                                                                                                                                                                                                                                                                                                                                                                                                                                                                                                                                                           

Legg ég því til að hornfirskir sjómenn, útgerðarmenn, veiðarfæragerðarmenn eða hugvitsmenn setji sér það takmark að þróa fjórðu aðferðina fyrir Íslendinga á næstu fjórum árum.

Auk þess legg ég til að kvótakerfið í núverandi mynd verði lagt í eyði.

Sagan af dollurunum

Ég átti nokkra bandaríska dollara. Hafði átt um nokkurt skeið og geymt undir koddanum mínum og sofið vært á þeim.  Ég ákvað á miðvikudaginn síðasta að selja  þá. Markmiðið var að lækka örlítið yfirdráttinn á tékkareikningnum enda borgum við Íslendingar eina hæstu vexti í heimi. Einnig var markmiðið að minnka áhættu á því að dollararnir dýrmætu týndust ekki eða yrði stolið.

Ég fylgdist lítið með fréttum þennan umrædda dag. Ég tölti upp í banka og seldi. Gerði ágæta sölu. Þegar ég hlustaði á fjármálafréttir síðar um daginn var aðalfréttin um fall krónunnar. Þrjúkommaátta prósent. Hún hefði ekki verið veikari í átta ár.  Ég velt því fyrir mér hvort ég hefði gert stór mistök. Hefði ég átt að bíða lengur?

Ég ákvað að pirra mig ekki á þessu flökti krónunnar.

Daginn eftir, í gær kl. 11.00, heyrði ég í fréttum er ég keyrði eftir Bústaðaveginum að krónan hefði fallið um 3.5% við opnun markaða um morguninn. Ég varð frekar pirraður en ók yfirvegað áfram.  Þegar í vinnuna var komið greindi ég nokkrum samstarfsmönnum frá þessum meintu mistökum mínum. Þau hughreystu mig og sögðu að ég ætti að gleðjast yfir góðri sölu á dollurunum.  Síðan leið dagurinn. Ríkisstjórnin fór að sýna að hún væri með lífsmarki og ákvað að hleypa lífi í íbúðamarkaðinn með  því að nota digra sjóði Íbúðalánasjóðs.  Í lok dags hafði dæmið snúist við hjá krónunni okkar. Hún hafði styrkst um 1.5%.

Salan hjá mér var sú besta í átta ár! - Vantar góðu fjármálafyrirtæki góðan sölumann?

Hér er kort yfir gengi íslensku krónunnar gagnvart bandarískum dal síðasta ár. Þar sem toppurinn er hæstur, það er dagurinn sem ég seldi dollarana mína.