Sauðarárfoss og foss Gaudi

Í spurningaþættinum Gettu betur í gærkveldi var spurt hvað orðið nostalgía merkti. Erfiðlega gekk hinum spöku menntskælingum að svara spurningunni en nostalgía merkir ‘söknuður eftir liðinni tíð’ eða ‘heimþrá’.

Það er ekki laust við að þetta ástand hafi komið yfir mig í Park Guell eða  Gaudi garðinum fyrir tæpum hálfum mánuði.

Þegar gengið er niður úr garðinum er lækur rennur niður hlíðina fagurlega skreyttur. Í miðjum læknum er mjög þekkt eðla.  Þegar ég gekk niður stigann og virti fyrir mér umgjörðina þá var ég allt í einu kominn í heim Sauðárfoss sem tengdist Jöklu. Í dag er þessi foss á miklu dýpi í Hálsalóni.

Gaudi hafði sett eðlu í fossinn í stað skötuorms en þeir lifa í leðju hálendisvatna.

Augnabliksfólk við Sauðárfoss í júlí 2005.

Lækurinn eða fossinn sem Gaudi hannaði. Það var mikill mannfjöldi þarna, mest fólk frá Asíu og geysimikið myndað.

Sauðárfoss í mörgum þrepum.

Eðlan fræga, eitt af táknum Barcelona. Þegar nóg vatn er í borginni lekur vant úr skolti eðlunnar.  Skötuormur er langstærsta krabbadýrið sem lifir í ferskvatni á Íslandi og er alveg stórmerkilegt líffræðilegt fyrirbæri.

Athugasemdir

[Sturla (IP-tala skráð) 9.3.2008 kl. 02:19]

Aldrei heyrt um þennan Skötuorm áður! Áhugavert... lítur út eins og dýr sem voru til fyrir 200 milljón árum.. merkilegt! ;-)

[Sigurpáll Ingibergsson, 9.3.2008 kl. 19:02]

Það var stórmagnað að sjá skötuorm í fyrsta skiptið.  Tvíkynja dýr sem ekkert hefur þróast.

Gaman að heyra frá þér. Sé að þú ert mikið í vinnunni. Við þurfum að halda Múlahátíð.

[Jón Halldór Guðmundsson, 9.3.2008 kl. 22:04]

Nostalgía er þrá eftir hinu liðna. Þetta er auðvitað skylt heimþrá, en hljómsveit sem starfaði um hríð hér á Seyðisfirði hét Þáþrá.  Það er Nostalgía, ekki satt?

[Sigurpáll Ingibergsson, 15.3.2008 kl. 21:38]

Ég heyrði ekki rétta svarið hjá Páli Ásgeir í spurningakeppninni. Fortíðarþrá hef ég heyrt um nostalgíu.  Þrá er stytting - gæti gengið.

Ég man eftir hljómsveitinni Þokkabót, var hún ekki frá Seyðisfirði?