Manuel Rivero Almunia

26.12.2007 | 00:00

Það eru komnar tvær mínútur fram yfir áætlaðan leiktíma á Emirates. Úkraínumaðurinn Andriy Schevchenko er að undirbúa aukaspyrnu rétt fyrir utan bogann. 60.130 taugar eru þandar til hins ýtrasta. Áhorfendur í Suðurstúku, bakvið mark Arsenal eru nokkuð yfirvegaðir. Þeir treysta á að hinn hávaxni, 193 cm, ljóshærði markvörðurinn sem ber nafnið Manuel Rivero Almunia og númerið 24 verji skotið. Hann er búinn að vera öryggið uppmálað í leiknum. Fast bogaskot kemur frá Sheva og okkar maður slær boltann yfir en hann stefndi neðarlega á markslánna. Leikurinn er unninn, þrjú stig í húsi og toppsætið í úrvalsdeildinni.

Uppruni

Hinn þrítugi þrautseigi markvörður kemur frá Pamplona frá Spáni. Hin hin árlegu nautahlaup La Corrida fara fram á götum borgarinnar. Þegar Almunia var unglingur tók hann nokkrar rispur á götunni með mannýg naut í bakinu. Það er mest áskorun hans. Hann er alinn upp við spennu og hefur stáltaugar. Því eru stórleikir eins og á móti nautsterkum leikmönnum Chelsea ekkert mál.

Ferillinn

Þegar Almunia var sex ára fékk hann markmannsbúning og markmannshanska í gjöf frá frænda sínum Juan, en hann þjáðist af astma. Því var ekki talið ráðlegt að gefa honum sóknarbúning með númerið 10 á bakinu. Draumurinn hjá honum eins og öllum strákum var að vera frammi og skora mörk.

Þegar Almunia var á átjánda ári gekk hann til liðs við Osasuna og spilað með B liðinu til 22 ára aldurs. Þá hefst mikið ferðalag milli félaga og borga. Næsta lið sem nýtti krafta Almunia var Cartagonova og síðan katalónska liðið CE Sabadell en þaðan fór hann til Celta Vigo (2001-2004). Ekki spilaði hann neinn með því liði en var lánaður til SD Eibar, Recreativo Huelva og Albacete. Þessi hringekja var ekki auðveld en Almunia telur að ör umskiptin hafi gert hann að sterkari persónuleika og leikmanni.

Almunia átti gott tímabil með Albacete og útsendarar Arsenal komu auga á hann. Hann var keyptur 14. júlí 2004 en þá var hann staddur í miðri brúðkaupsferð á Napólí.

Umboðsmaður Almunia tjáði honum að hann gæti gefið honum glæsilega brúðkaupsgjöf. Umbinn sagði að Arsenal hefði áhuga á að fá hann til liðs við sig. Þegar hjónakornin voru á Napólíflóa þá kom kallið. „Þú átt að fljúga til London eftir tvo tíma og mæta í læknisskoðun!“

Tíminn hjá Arsenal

Markvörður númer 1 hjá Arsenal var Þjóðverjinn Jens Lehmann og var bekkurinn hlutskipti Almunia. Fyrsti leikurinn var sigurleikur gegn Manchester City í Carling Cup. Hann hefur leyst vel af í marki Arsenal og sýnt að þolinmæði er dyggð. Lehmann átti erfitt uppdráttar í byrjun tímabils og nýtti Spánverjinn tækifærið vel. Hann er kominn fyrir framan þýska landsliðsmanninn í goggunarröðinni og telur Bob Wilson góð frammistaða Almunia sé lykilinn að góðum árangri liðsins á tímabilinu. Hann hafi breyst mikið og hafi góða nærveru. Hafi verið mun vaskari til vopna sinna. Það sást greinilega í leiknum á móti Chelsea. Það var léttara yfir öftustu vörn Arsenal og þeir hrósuðu hver öðrum mikið. Einnig var samband hans við stuðningsmenn á Emirates leikvanginum traust.

Góð frammistaða Almunia hefur hrifið enska knattspyrnublaðamenn. Þeir hafa komist að því að eftir nokkra mánuði geti hann fengið enskt ríkisfang. Blaðamennirnir eru búnir að velja Almunia í enska markið fyrir launahæsta þjálfar heims Fabio Capello. En Almunia er jarðbundinn. Hann veit að það skiptast á skyn og skúrir í boltanum og tvö mistök geta þýtt nýtt líf.

Áhugamál

Helsta áhugamál Almunia er stríðssaga en kvikmyndin Saving Private Ryan var mikill áhrifavaldur. Þetta er áhugamál vð hæfi fyrir leikmann hjá Vopnabúrinu. Hann á margar bækur og heimildarmyndir á DVD um stríðssöguna, mótel af skriðdrekum og þess háttar varning. Fyrr á árinu fór kappinn ásamt spúsu til Normandí og var það áhrifamikið ferðalag. Hann hefur nýtt sér þekkinguna í herleiðangri sínum að númeri 1 hjá Arsenal.

Heimildir:

Arsenal.com

Arsenal magazine

Daily Mail

Wikipedia - http://en.wikipedia.org/wiki/Manuel_Almunia