Hvað eiga Hornafjörður og Schwarzsee sameiginlegt?

Ég tók þykka bók að láni í Bókasafni Kópavogs um daginn. Fjallamenn heitir hún frá árinu 1946. Höfundur er Guðmundur Einarsson frá Miðdal. Ég var ekki viss um að komast í gegnum doðrantinn og ætlaði að fletta í gegnum verkið hjá listamanninum en hann teiknaði margar myndir sem birtast í bókinni.  Eftir að hafa komist í gegnum fyrsta kaflann leist mér mjög vel á verkið. Guðmundur hefur verið mikill raunvísindamaður og hefur góðan stíl. Það er alltaf gaman að lesa lýsingar ferðamanna á Hornafirði. Allir alltaf jafn jákvæðir enda Hornfirðingar höfðingjar heim að sækja.

Hann er að fara í ferð um Vatnajökul austanverðan og kemur með strandferðaskipi til Hornafjarðar.(bls. 84)

 

"Hornafjörður á engan sinn líka að margbreytilegri fegurð. Þó er til í smækkaðri mynd líking af skriðjöklunum fimm, sem steypast þar í hálfhring ofan af hájöklinum. Það er við Schwartzsee (Svartavatn) í Zillertal í austurrísku Ölpunum. Ekki skorti góðar viðtökur í gistihúsinu og hjá öðrum íbúum þorpsins. Það er alltaf gaman að koma í þorp, þar sem maður getur átt von á að mæta kúm og kindum á götunni og sér fólkið með amboð um öxl eða þá akandi með skarkola og annan fisk utan úr firðinum; fiskmeti, sem varla er metið til peninga, af því að hægt er að sækja það fyrirhafnarlítið."

 

Ég fór strax á Netið og leitaði að þessari perlu í austurrísku Ölpunum. En gekk illa að finna staðinn. Stafsetningin á Svartavatni hefur líklega breyst með árunum. Þegar leitað var eftir Schwarzsee kom mikið af síðum. En staðurinn er í 2.472 m hæð í Zillertal dalnum. 

Það er rétt hjá Guðmundi, staðirnir tveir eiga margt sameiginlegt. Ég stefni til Tíról í gönguferð á næstu árum og einnig að jóðla. Verzt að kunna ekkert á skíði en ég veit aðeins um einn Hornfirðing sem kann þá íþrótt.

 

 

 

 

 

Tenglar: 

http://www.naturpark-zillertal.at/index.php?id=1015 

http://www.summitpost.org/image/176413/176305/berlinerspitze-from-schwarzsee.html 

Athugasemdir

[Þórbergur Torfason, 23.10.2007 kl. 22:20]

Sæll Sigurpáll. Bara þú vitir það, ég hef aldrei talið mig Hornfirðing og mun aldrei gera það en ég kann á skíði. Það lærði ég á 13 ára búsetu undir Hlíðarfjalli.

[Jóhannes Einarsson, 24.10.2007 kl. 15:11]

Ef þú átt Eddu Þórbergs þá er þar frábær samanburður á Siglufirði vs Nesjum og Hornafirði sem ekki stenst lengur, og eitt enn, ég hef komið á Zillertal en það er mega bjórkrá við Reperbahn í Hamborg, og enn eitt, hvað merkir rauða línan á kortinu úr Ölpunum mér finst skriftin aðeins ógreinileg ?

[Sigurpáll Ingibergsson, 24.10.2007 kl. 18:00]

Það var líklega vanhugsað að skilgreina Hornafjörð svona vítt og breytt. Sá skíðamaður sem ég hafði í huga býr ekki mjög langt frá þér Þórbergur!

En er ekki kominn tími á Hornafjarðarmeistaramóti á skíðum. Halda það á Vatnajökli.

Jú, ég man eftir lýsingunni í Eddu, góð ábending hjá þér Jóhannes. Bloggaði um hana fyrir stuttu. http://fiskholl.blog.is/blog/fiskholl/entry/239705/

    Í Nesjum grænar grundir

    gróa við lygnan straum,

    og ljósálfar bjartir leiðast

    um landið í sólardraum'.

Flott að vita af þessari krá í Hamborg, ég heimsæki hana í leiðangrinum.

Rauða línan er gönguleið upp í  Berliner Hutte og þaðan er hægt að ganga til Svartavatns. Lýsingin á línunum er á japönsku og ég er enn að stauta mig í gegnum textann!