Bridshátíð 2002

Á Bridshátið 2002, þeirri 21. í röðinni, mættu margir góðir spilarar að vanda. Ég skrapaði í sveit rétt fyrir hátíð. Markmiðið var að ná í þrjú gullstig til að ná í spaðanálina, 250 meistarastig.  Ég hafði samband við Baldur Kristjánsson og hann var til í átökin. Sveinn Rúnar keppnisstjóri fann svo þétt par frá Akureyri með okkur. Þá Örlyg Má Örlygsson og Reyni Helgason.

Okkur gekk þrælvel. Eftir þrjá stóra sigra í fyrstu þrem umferðunum  fengum við verðugt verkefni.  Leik við alþjóðasveit Geir Helgemo og sýna átti leikinn á töflu. Ekki hafði ég lenti í því fyrr en þetta var skemmtileg áskorun. Ég og klerkurinn vorum sendir niður í lokaða salinn en Norðlendingarnir voru uppi í opna salnum. Þar glímdu þeir við Hacket tvíburana ungu og efnilegu. Þegar niður var komið voru Norðmaðurinn Geir Helgemo og eldri maður, enskt prúðmenni sem kynnti sig sem Paul Hacket.  Ég hafði lesið um norðmanninn Geir, sem hafði Prins Valiant klippingu að hann væri geysiöflugur úrspilari. Hann hafði oft unnið verðlaun fyrir bestu sókn eða bestu vörn í mótum. Paul var hinsvegar þekktastur fyrir að vera faðir bridstvíburanna.

Við fórum yfir sagnkerfi á örstundu. Þeir spiluðu einfalt standard kerfi en opnuðu á hálit með fjórlit. Hvur röndóttur hugsaði ég, hvernig skal verjast því? Það verður gaman eða hitt þó heldur að glíma við það í beinni útsendingu!  Síðan hófust leikar. Spilin voru einföld, opnun og stokkið í geim. Yfirleitt stóðu þau og skiptust frekar jafnt á milli para. 

Í tíunda og síðasta spili töfluleiksins opnar séra Baldur á 2 laufum, alkrafa. Ég svara frekar jákvætt, átti nálægt átta punktum. Baldur endaði í hálfslemmu í hjarta og stóð hana með vandaðri spilamennsku. Þegar við komum upp var spilamennsku lokið í opna salnum og búið að reikna allt. Það er kosturinn við að vera í töfluleik. Flesti spilin féllu en hálfslemman hans Baldurs var góð sveifla til okkar og hafðist eftirminnilegur sigur 17-13 á móti þessari firna sterku sveit.  

Toppnum hjá mér í brids var náð og ég hætti keppnisspilamennsku.

Geir hélt áfram og er orðin heimsmeistari. Ég óska Norðmönnum hjartanlega til hamingju.

Heyja Norge. 

Norðmenn heimsmeistarar í brids

Athugasemdir

[Ási (IP-tala skráð) 13.10.2007 kl. 11:55]

Þú getur þá rétt ímyndað þér hve Hela Mó og öðrum frændum vorum í Noregi létti er þeir fréttu að þú hefðir lagt spilin á hilluna. -Þeirra var sviðið og eftirleikur auðveldur.

Í annan stað má senda þér skammir fyrir að hafa ekki lagt rækt við íþróttina, þar sem það hefur greinilega komið niður á landsliðinu okkar.

En að gamni slepptu þá var gaman að rekast á færsluna þína.

Laugarvatnskveðja, Ási.

[Sigurpáll Ingibergsson, 13.10.2007 kl. 12:08]

Takk Ási!

Gaman að heyra frá þér.

Þegar við stunduðum nám í Menntaskólanum að Laugarvatni var brids mikið spilað. ML var áskrifandi að framhaldsskólatitlinum í brids. Í dag er ekkert spilað í ML.

Það var Sjónvarpið  sem drap bridsinn á setustofunni.