Meðalfell í Kjós (360 m)

Kjósin er breiður dalur á milli Esjunnar að sunnan en Reynivallaháls að norðan. Í miðjum dalnum vestantil stendur stakt fell, sem heitir Meðalfell. Útivistarræktin heimsótti það á fallegu ágústkvöldi.

Það var fallegt og gott veður allan daginn en dró fyrir sólu er vinnu lauk. Á Kjalarnesi á leiðinni upp í Kjós var napurt og hafði ég áhyggjur af litlum aukafatnaði. Þegar inn í Kjósina kom lægði og mildaðist veður. Aðkoman að fellinu austanverðu er glæsileg. Kyrrt Meðalfellsvatn með snyrtilegum sumarbústöðum og heilsárshúsum. Falleg tré í hverjum garði.

Stafalogn var þegar göngustafir voru mundaðir og gekk vel að komast upp á fellið. Víðsýni er ekki mikið því Reynivallarháls er hærri í norðri. Í austri sá í Hvalfell og Botnsúlur eins og turnar, og síðan tók Esjan fyrir alla fjarsýn í suður.

Dalirnir sem skerast inn í Esjuna norðanverða fylgdu okkur. Eyjadalur, Flekkudalur og Eilífsdalur. Móskarðshnjúkar sýndu okkur aðra hlið sína inn af Eyjadal og formfagurt fjall, Trana, tranaði sér fram austan við þá.

Meðalfell var þakið krækiberjum frá rótum og upp á bak, kolsvart og einnig voru bláber en í miklu minna mæli. Fylltu menn lúkur af krækiberjum á milli skrefa. Á miðju fellinu var stoppað í laut og nesti með krækiberjum snætt. 

Eftir smá stopp var halið áfram og eftir um 3 km gang er komið að vörðu og er þar hæsti punktur á bungunni, 360 metrar.  Þegar gægst var fram af brúnum fellsins sást vel gróið og búsældarlegt land  með bugðótta og aflasæla Laxá. Í suðri sá í spegilslétt Meðalfellsvatn. Þegar vestar dró kom enn ein varða og þá sást Harðhaus í fyrsta skipti. Minnti þessi sýn mig mikið á sýn frá Fimmvörðuhálsi og sá þá yfir Heljarkamb og Morinsheiði.

Af Harðhausnum er flott sýn í vestur út fyrir Hvalfjörðinn, austurhluta Akrafjalls og yfir álver Norðuráls og Járnblendiverksmiðjan menguðu fegurðina í Hvalfirði  í ljósaskiptunum. Þegar myrkur var skollið á á heimleiðinni sáust aðeins ljósin í verksmiðjunum og lagaðist sjónmengunin.  Haldið var niður gróinn Harðhaus í ljósaskiptunum og gengið að bílum í blóðrauðu sólarlagi. Byggðin við vatnið naut sýn vel og nú skil ég af hverju margir listamenn búa þarna en þeir hljóta að fá mikinn innblástur á svona stundum.

Einn göngumaður skrifaði í stöðu sína á Facebook eftir ferð á fellið "bak við Esjuna":

"Fór í flottustu kvöldgöngu sumarsins........ Meðalfell, sólsetrið, ljósaskiptin, lognið og hitinn fyrir svo utan fegurðina og félagsskapinn, fer sátt í háttinn! :-)"

 

Dagsetning: 18. ágúst 2010
Hæð: 360 metrar
Hæð í göngubyrjun:  76 metrar, við eystri enda fellsins (64.18.334 - 21.31.335).             
Uppgöngutími:  80 mín (19:30 - 20:50)  2.9 km.
Heildargöngutími: 160 mínútur  (19:30 - 22:10)
Erfiðleikastig: 1 skór
GPS-hnit varða:  N: 64.19.137 - W: 21.34.472

Vegalengd:  10 km (2,9 km bein lína frá bíl að toppi. Vestur enda Meðalfells 4,5 km)
Veður kl 21, Þingvellir: 13,7 gráður,  1 m/s af NA og bjart, raki 72%
Þátttakendur: Útivistarræktin, 50 manns  - 17 bílar.                                                                     
GSM samband:  Já - gott samband
Gönguleiðalýsing: Lítil mannraun og þægileg kyrrðarganga yfir Meðalfell í Kjós sem var þakið krækiberjum og einnig sáust bláber. Fallegt útsýni yfir búsældarlega Kjósina, bugðótt Laxá í norðri og kyrrt gróðursælt Meðalfellsvatn í suðri.

 

 

Heimild:

Morgunblaðið, 28. ágúst 1980.