El Teide á Tenerife

Nú styttist í sumarfríið. Á miðvikudaginn hefst fríið og verður stigið upp í flugvél sem heldur beit í suður og lendir á einni Kanaríeyjunni, Tenerife.

Fyrstu dagarnir verða teknir rólega, þeir fara í að finna út bestu veitingastaðina, beztu barina, beztu sundlaugina og beztu verzlanir í nágrenni hótelsins.

Það er hægt að  gera meira en liggja í sólinni á eyjunni. Á Tenerife er merkilegur þjóðgarður og merkilegt eldfjall. Hæsti tindur Spánar hinn 3.716 m El Teide, rís upp úr hjarta Canadas öskjunnar sem er um 12 km í þvermál og 17 km enda á milli þar sem lengst er. Askjan er því fjórum sinnum stærri en Öræfjajökull.

Ég stefni á toppinn og komist maður á hæsta punkt þá set ég persónulegt hæðarmet. Hins vegar verður þetta ekki mikið gönguafrek. Hægt er að ferðast með bíl í 2.300 m hæð og síðan er hægt að taka kláf upp í 3.500 metra hæð. Þá eru eftir 200 metrar og þarf leyfi yfirvalda til að komast þangað.

Þjóðgarðurinn El Teide er einnig merkilegur. Hann er fyrir marga hluti sérstakur. Stærstur hluti hans er í mikilli hæð, um og yfir það sem við þekkjum sem hæstu tinda á Íslandi.  Loftslag á svæðinu er gjörólíkt því sem þekkist annarsstaðar á Kanaríeyjum og sumir hafa kallað "hitabeltisháfjallaloftslag", sem er það eina sinnar  tegundar í Evrópu. Meðal annars vegna þessa er lífrænt ríkidæmi svæðisins sérstakt.