Frábært skipulag í Jónsmessunæturgöngu yfir 5-vörðuháls

Erfiðasti hluti Jónsmessuferðarinnar á 5-vörðuháls var að komast út úr bænum og inn aftur. Umferðin var þung á föstudagskveldið og við Rauðavatn var rútan stopp nokkrum sinnum.

En ef þessu er sleppt þá var ferðin mjög vel heppnuð. Skipulagið í 14. Jónsmessuferðinni hjá Útivist var óaðfinnanlegt. Frábært að sjá hvað fólk var tilbúið að leggja á sig svo við 300 Jónsmessufarar nytum messunar.  Björgunarsveitarfólk stóð vaktina á Skógaheiði og veitti veitingar. Einnig var kamar í 400 m hæð. Skipulagið í Básum var magnað hjá sjálfboðaliðum í Útivist og náði hápunkti í grillveislunni í gærkveldi. Það var ekki lengi verið að þjóna þrjúhundruð manns.