Grábrók (170 m) 2017

Það var gaman að ganga upp á Grábrók í sumar og hafa einstakt útsýni yfir Borgarfjarðarhérað og Norðurárdalinn. Sjá Baulu í öllu sínu veldi, Hrauns­nef­söxl, Hreðavatn, Bifröst og Norðurá. Það sem vakti mesta athygli er göngustigar sem stýrir umferð um viðkvæmt fjallið eða fellið.

Mér finnst vel hafa tekist til með gerð göngustigana og merkinga til að stýra umferð gangandi og auka öryggi, en svona inngrip er umdeilt en eitthvað þarf að gera til að vernda óvenjulega viðkvæmt svæði þar sem hraun og mosi er undir fótum. 

Grábrók er einn af þremur gígum í stuttri gígaröð. Þeir heita Grábrók (Stóra – Grábrók), Smábrók (litla Grábrók) og Grábrókarfell (Rauðabrók). Úr þeim rann Grábrókarhraun fyrir 3.200 árum og myndaði meðal annars umgjörð Hreðavatns. Efni í vegi var tekið úr Smábrók á sjötta áratugnum og tókst að stoppa þá eyðileggingu.

Daginn eftir var gengin hringur sem Grábrókarhraun skóp, gengið frá Glanna, niður í Paradísarlaut og meðfram Norðurá og kíkt á þetta laxveiðistaði. Það var mikil sól og vont að gleyma sólarvörninni. Mæli með bók eftir Reyni Ingibjartsson, 25 gönguleiðir í Borgarfirði og Dölum fyrir stuttar upplifunarferðir.

Dagsetning: 24.júní 2017
Hæð: Um 170 metrar
Hæð í göngubyrjun: Um 100 m (N:64° 46' 17.614" W:21° 32' 23.370")
Hækkun: 70 metrar
Heildargöngutími: 30 mínútur (20:00 - 20:30)
Erfiðleikastig: 1 skór 
Þátttakendur: Fjölskylduferð, 6 manns 
GSM samband: Já
Gestabók: Nei
Gönguleiðalýsing: Létt ganga mest upp eða niður göngustiga

Hér sér ofan í gíginn í Grábrók sem gaus fyrir 3.200 árum. Manngerðir göngustigar sem minnka álag og falla ágætlega að umhverfinu liggja upp og niður fjallið.

Athugasemdir

[Helga Kristjánsdóttir, 12.11.2017 kl. 23:28]

Jæja gott að sjá að það eru komnir göngustígar úr tré þarna.við sem unnum á hótel Bifröst eftir 1958 fórum oft upp á Grábrók og komum svo við í Hreðavatnsskála hjá "Fúsa vert"sem heilsaði okkur jafnan með orðunum"þið komið úr slotinu í kotið"skemmtilegur kall sem sagði okkur ævintýrasögur frá öllum heimshornum sem hann hafði ferðast til.....

[Agla, 13.11.2017 kl. 11:13]

Sammála þér eins og oftar.

Gaman að vita að þú ert sú eina og sanna Helga Kristjáns, eins og mig reyndar grunaði.

Ég pumpaði bensín á Bifröst á þessum árum og endaði á skrifstofunni/símanum en komst aldrei í salinn.

Kær kveðja.

[Helga Kristjánsdóttir, 13.11.2017 kl. 13:54]

 Sæl Agla mín! Gaman að heyra og þakka þér fyrir að minna mig á þig. Eitthvað ruglaðist ég með tímann held ég hafi byrjað sumarið ´56 og var í 4 sumur. Ég kom við í Bifröst fyrir uþb.4 áru og færði eigandaum mynd af gamla"staffinu"- en nú sendi ég kærar kveðjur og bið um vinasamband á réttum stað..