Fellaþrenna: Helgafell (340 m) Valahnúkar (205 m) Húsfell (295 m)

Rétt innan við Hafnarfjörð standa nokkur fell úti í hrauni. Lagt var frá Kaldárseli og gengið sem leið lá upp á Helgafellið. Þaðan var haldið niður á við og gengið á Valahnjúka. Komum við í Valabóli og Músahelli áður en Húsfell var gengið.

Þegar gengið var upp Helgafell um gilið í miðju fellinu, þá heyrðist í þyrlu frá Norðurflugi.  Þegar á toppinn var komið, þá var þyrlan lent á sléttum toppnum og mynduðu ferðamenn sig í bak og fyrir. Vakti hún verðskuldaða athygli en það blés vel um toppinn. 

Mjög eftirminnilegt atvik í fjallgöngusögu minni en maður veltir fyrir sér reglum um lendingar hjá þyrlu í fólkvangi og kyrrð og ró fjallgöngumannsins. Það geta skapast hættur á fjöllum.

Eftir uppákomuna á Helgafelli var lagt á Valahnúka en þeir eru í beinni línu milli Helgafells og Húsfells.

Toppurinn á Valahnúkum er klettur og vaggaði hann en Valahnúkar eru taldir hafa myndast í gosi fyrir um 120 þúsund árum.

Frá vaggandi Valahnúk var haldið að Valabóli og orku safnað fyrir síðasta fellið, Húsfell.

Margt sér á miðju Húsfelli, Búrfellsgjá blá. Húsfell er umkringt hrauni sem er komið ofan úr Rjúpnadyngjum og á að hafa myndast á tímabilinu 900 - 1500.

Á toppi Helgafells í Hafnarfirði. Þyrla með fjallgöngufólk!

Dagsetning: 1. febrúar 2014
Kaldársel upphaf: 84 m (N:64.01.374 – W:21.52.066)
Helgafell: 340 m - hækkun: 200 m
Húsfell: 306 m (N:64.01.591 – W:21.47.947)
Valahnúkar: 205 m (N:64.01.192 – W:21.50.118)
Heildarlækkun:  Um 400 metrar         
Heildargöngutími: 2,5 klst, 263 mínútur (10:07 - 14:30)
Erfiðleikastig:  2 skór
Vegalengd:  14,1 km
Skref: 18,874  og 1,257 kkal
Veður kl. 12 Bláfjallaskáli: Skýjað, austan 10 m/s.  4,5 °C hiti og 64% raki. Skyggni 50 km.
Þátttakendur: Ferðafélag Árnesinga, 32 félagar
GSM samband:  Já, enda í útjaðri Hafnarfjarðar. Stöðugt 3G-samband.

Gönguleiðalýsing: Gengið eftir vel gengnu hrauni milli fella. Flott fellaþrenna.

Séð frá Helgafelli, yfir Valahnúka og yfir á Helgafell.

Athugasemdir

[Emil Hannes Valgeirsson, 19.3.2014 kl. 19:50]

Upplifði það sama fyrir nokkrum árum þegar þyrla lenti á Helgafelli. Það var reyndar mjög stutt stop og engin steig út úr þyrlunni.