Að falla niður um deild það hrikalegasta sem komið gæti fyrir liðið

Mannlegar náttúruhamfarir.

Það er merkilegt að sama þjálfarateymið skuli fá að halda áfram með liðið. Árangur úr 300 stigum í 130 er mikil afturför. Ef knattspyrnulið hefði uppskorið þennan árangur væri fyrir löngu búið að reka þjálfarann. Stóra vandamálið er hins vegar að fótbolti er leikur en sjávarútvegur dauðans alvara. Þar er spilað um líf fólks.

En stuðningsmennirnir á landsbyggðinni hefðu átt að láta betur í sér heyra.  Ótrúlegt að þeir skuli kjósa yfir sig sömu vandamálin tímabil eftir tímabil. Nú uppskera þeir eins og til var sáð.

Að missa þorskstofninn það hrikalegasta sem komið gæti fyrir þessa kynslóð

Hákarlabeita **

Ég og Ari litli brugðum okkur í tvöbíó í gær og fyrir valinu var Smárabíó. Í sal 1 var kvikmyndin Hákarlabeita - Shark bait - sýnd og smekkfullur salur enda Síminn með gott 3G-tilboð, 2 fyrir 1.

Tölvuteiknimyndin Hákarlabeita gerist í hafdjúpinu og hefst sagan í megnaðri San Fransiscohöfninni. Söguhetjan, Pi, lítill rauður skrautfiskur er líktist gullfisk okkar er að ræða við foreldra sína um hættur hafsins þegar nót er kastað yfir þau. Söguhetjan sleppur úr nótinni og fær þau skilaboð að flýja til kóralrifsins. Hann kemst þangað og Þar er mikið líf. Á rifinu kynnist hann sætri hrygnu. Hún hafði komist á forsíðu Séð og veitt og var það eini heppnaði brandari myndarinnar. Úr verður klisjukennd ástarsaga. Upp kemur vandamál, háfur einn verður hrifinn af hrygnunni og mikið uppgjör er í uppsiglingu. Söguhetjan gefst ekki upp og leitar á náðir gamallar skjaldböku sem man tímanna tvenna. Hún tekur að sér að þjálfa og uppfræða hænginn okkar. Minnir þetta mig á karatemyndir úr Sindrabæ. En í þeim myndum lenti lærlingurinn ávallt í vandræðum og leitaði á náðir sérvits meistara, sem byrjaði á því að rífa lærlinginn alveg niður og byggja síðan upp.

Uppgjörið milli hængsins okkar og hákarlsins er svo eftir Hollýwood formúlunni  

Á rifinu er margir skrautlegir fiskar en mér finnst vandaðir fræðsluþættir betri. Náttúran er tölvugrafíkinni fremri.  Jákvæða við myndina  og síðustu myndir sem við feðgar höfum farið á er að umhverfisvernd er innbyggð í kvikmyndirnar. Það er gott markmið.

Íslensku leikurunum sem tala inn á myndina tekst ekki vel upp. Spaugstofukapparnir Örn og Siggi ná þó ágætri rispu með lífsreyndu sverðfiskanna. 

Hákarlabeita fær ekki nema tvær stjörnur af fimm mögulegum hjá okkur feðgum.

Emmanuel Adebayor - Dressed to Thrill

Ade, Ade, sungu áhorfendur á Emirates Stadium í febrúar á síðustu leiktíð. Arsenal var undir í leik á móti Wigan og framlínan þurfti hjálp, hún þurfti einhver töfrabrögð.  Tógóbúinn Emmanuel Adebayor var svarið. Hann kom inná fljótlega í síðari hálfleik og hóf að hrekkja varnarmenn Wigan með boltatækni sinni. Þeir vörðust vel en á 81. mínútu jöfnuðust leikar og skömmu síðar skoraði Rosicky fyrsta deildarmark sitt og sigurmarkið eftir góðan undirbúning frá Adebayor.

Þetta var fyrsti leikurinn sem ég sá á Emirates Stadium og í febrúarhefti tímaritsins Arsenal - The Official Magazine var Emmanuel Adebayor á forsíðu skælbrosandi, klæddur eftir nýjustu tísku og fyrirsögnin - Striking A Pose.

Frá því að Adebayor man eftir sér var hann að spila knattspyrnu á götum og ströndum heimabæjar síns, Lome í Togo. Þegar hann var 15 ára tóku útsendarar franska liðsins FC Metz eftir honum á knattspyrnumóti í Svíþjóð og buðu honum í æfingabúðir hjá félaginu. Hann yfirgaf fjölskyldu og vini sem voru búsettir í Vestur-Afríkuríkinu Tógo  og hélt á vit ævintýranna.   En honum líkaði ekki vistin hjá FC Metz og eftir tvo daga ætlaði hann að snúa heim. Lífið var erfitt og kalt var í veðri, allt svo frábrugðið Afríku. Hann ræddi málin við þjálfarann. "Ég vil fara heim" sagði hann.  Þjálfarinn. Francis de Taddeo sagði að hann ætti völina, en þú skalt hafa það í huga áður en þú tekur lokaákvörðun að það eru margir landar þínir sem vildu vera í þínum sporum.  

"Þetta var góður punktur, og ég hugsaði um þessi orð alla nóttina. Næsta dag sagði ég við þjálfarann að ég ætlaði að halda áfram og bíða örlaganna."  Þetta var besta ákvörðun sem Adebayor hefur tekið um ævina. Hann hóf síðan að leika með unglingaliði Metz. Þeim gekk vel, Ade skoraði nokkur mörk og Metz vann U-17 ára deildina. Síðan fékk hann samning við aðallið félagsins.  Adebayor gekk vel á fyrsta tímabilinu en árangur liðsins var ekki eins góður, uppskeran var fall í aðra deild. Annar leikmaður kunnur í herbúðum Arsenal hóf ferlinn hjá Metz, vængmaðurinn Robert Pires.

Næsta ár var toppbarátta í 2. deild og skoraði  Adebayor 17 mörk í 35 leikjum. Vakti sá árangur athygli Mónakómanna og gekk hann til liðs við þá árið 2003.  Eftir það hefur Adebayor ekki litið um öxl og framinn verið á stanslausri uppleið. 

Adebayor fæddist í Lome, höfuðborg Tógó, 26. febrúar 1984. Hann er hávaxinn, 193 cm (6'4") og sterkur eins og afrískt ljón. Hann hóf strax að leika sér með bolta og var mikið á ströndinni enda bjó fjölskylda hans sem er frá Nígeríu fótboltavallarlengd frá henni. Þar þróaði hann knatttæknina. Hann hafði lítinn áhuga á að ganga í skóla en hann var staðsettur í Ghana en fjölskyldan bjó við landamærin og því 10 mínútna ganga. Þar var töluð enska en í Togo er töluð franska.

Ekki átti Adebayor von á því að spila fyrir Arsenal þegar hann var í Frakklandi en hann fylgdist með liðinu enda hetjan Kanu í liðinu. Þegar janúarglugginn opnaðist 2006 kom símtal frá Wenger og tilboð. Því var ekki hægt að hafna.  Byrjunin var góð, mark í upphafsleik gegn Birmingham, þrjú mörk fylgdu í kjölfarið á því tímabili.  Á síðasta leiktímabili stimplaði Adebayor sig inn með því að skora sigurmarkið á Old Trafford. "Það var stór stund fyrir mig, einsog að losna við stórt fjall af hausnum", þannig lýsir hann markinu.  Eftir það var mesta pressan horfin og miklar framfarir. Wenger hafði svo mikla trú á Adebayor að hann seldi kónginn Thierry Henry til Barcelona. Strákurinn hefur staðið vel undir væntingum og byrjunin á keppnistímabilinu frábær. Fyrsta þrennan leit ljós í dag á móti Derby County og eflaust eiga þær eftir að verða fleiri.

 

 

 

 

Eitt helzta áhugamál Emmanuel Adebayor er að verzla fatnað en þá iðju hóf hann í Mónakó og var daglegur gestur í tískuvöruverzlunum spilaborgarinnar. Nú fylgist hann með nýjustu tísku í London en fer ekki eins oft í verzlunarferðir í heimsborginni, aðeins einu sinni í mánuði, restin af frítímanum fer í knattæfingar. Hann á einnig gott skósafn, yfir 200 skópör. 

 

 

 

 

 

 

 

Ferillinn 

FC Metz (1999-2003) 44 leikir og 19 mörk.

Monaco  (2003-2006) 95 leikir og 19 mörk. 

Arsenal  (2006- )         65 leikir og 22 mörk. 

Tógó frá 11. október 2003, 34 leikir og 12 mörk.   

 

Heimild:

Arsenal, The official Magazine, febrúar 2006. 

Wenger: Adebayor er eins og ljón

Samgönguvika

Það var fallgur föstudagur í morgun. Ég átti erindi í miðbæinn í morgun og tók þjón náttúrunnar, strætó.

Í Hamraborginni þarf að taka ásinn niður í Lækjargötu. Þegar vagninn stoppaði var hann vel mannaður. Setið í hverju sæti og margmennt í stæði miðsvæðis. Eftir að við Hamraborgarar bættumst við var fullt fram að framdyrum. Ástandið minnti mig á myndir frá Indlandi og Kína. Það vantaði bara fólk sem hékk utaná vagninum.  Meðal farþega voru Svíar og töluðu mikið. Það var skemmtileg alþjóðleg stemming í vagninum. Ferðin niður í miðbæ gekk vel í fallega veðrinu. Á Miklubraut er sé akrein fyrir almenningsfaratæki. Það var góð tilfinning að keyra framhjá einkabílaröðinni.

Vinsældir Strætó eru að aukast og eru það góðar fréttir. Virðingin og stemmingin fyrir þessum ferðamáta er að aukast. Það sést vel á því að símafyrirtækið Sko er búið að finna markhóp í farþegum Strætó.  Auglýsingin hefst eitthvað á þessa leið. - Ef þú er svo sniðugur að nota strætó til að spara pening, eyða honum ekki í vitleysu einsog bensín og tryggingar þá ættir þú að skoða fleiri möguleika á sparnaði. Síðan segja þau frá sparnaðarleiðum sínum.

Eftir að stuttu erindi mínu var lokið í miðbænum þá tók ég vagn upp á Hlemm. Ásinn kom eins og kallaður en var tómur. Ég var einn alla leið upp á Hlemm. Það var íslensk stemming á leiðinni. Ég þjónaði náttúrinni, ég tók strætó.

Hins vegar er farþegafjöldi í strætó eins og veðrið hér á Íslandi. Annaðhvort í ökkla eða eyra. Pikkfullt eða tómt. Stormur eða góðviðri.

Olíustríðið í Írak og þrælastríðið í Bandaríkjunum

Alan Greenspan hefur rétt fyrir sér. Góð greining hjá honum í ævisögunni sem kemur brátt út. Í lok marz 2003 skrifaði ég pistil á hugi.is um Olíustríðið í Írak en það minnti mig á þrælastríðið í Bandaríkjunum 1861.

Þrælastríðið og Olíustríðið

Þegar ég heyrði fréttir rétt fyrir helgi að hermenn Bandaríkjanna og Breta ætluðu að taka pásu og bíða eftir meiri herstyrk til að ráðast á Bagdad rifjaðist upp fyrir mér að hafa lesið um byrjunina á Borgarastríðinu í Bandaríkjunum (Þrælastríðinu) í bókinni Abraham Lincoln eftir Thorolf Smith. Sú byrjun minnti mig á væntingar manna fyrir stríðið við Írak, stutt og einfalt stríð. Svo fór þó ekki, stríðið stóð í tæp 4 ár og 620 þúsund manns létu lífið. Norðurríkin voru fjölmennari og sterkari, því áttu þau að eiga sigurinn vísann í snörpu stríði.

Sagt er að sagan endurtaki sig en það er það sem mér datt í hug um helgina.

Borgarastyrjöldin hefst
Um það bil 50 kílómetrum suðvestur af Washington rennur áin Bull Run. Þetta er hvorki mikið né merkilegt vatnsfall, en hefur öðlast nokkra frægð, vegna þess, að þar var háð fyrsta orrusta borgarastyrjaldarinnar. Orrusta þessi var háð hinn 21. júní 1861.

Það voru fyrst og fremst dagblöðin, og þar með almenningsálitið, sem kröfðust þess, að nú yrði látið til skarar skríða. Það liggur nú ljóst fyrir, að almenningur í Norðurríkjunm gerð sér enga grein fyrir því sumarið 1861, að styrjöldin myndi verða löng, mannskæð og erfið. Blöðin ýttu undir þennan misskiling með fáránlegum æsingarskrifum.

Svo virðist, sem menn hafi litið á hina fyrirhugðu orrustu sem einhvers konar íþrótta- eða hestamannamót. Mikill fjöldi áhorfenda þyrptist frá Washington og víðar að suður til Bull Run. Fólk dreif að, samkvæmt tilvísun blaðanna, sem greindu kyrfilega frá því, hvar orrustan yrði. Sumir komu í léttvögnum og höfðu matarkörfur og vínflöskur meðferðis, aðrir á hestum eða gangandi. Þarna voru þingmenn og hefðarkonur, slæpingjalýður, allra þjóða lits og blands. Fréttaritari blaðsins Times í Lundúnum, Russell að nafni, hafði gaman af, er honum var tilkynnt, að herinn myndi hefja sóknina snemma næsta morgun með því að senda fyrst fram hægri væng. Ekki verður sagt, að mikil hula hafi hvílt yfir hernaðaráformum Norðurríkjamanna þennan sólheita júlídag.

En hernaðaráætlun Norðanmanna brást og mætti fyrir öflugri her og betri hershöfðingum. Brást flótti í lið Norðurríkjanna, og flúði hver sem betur gat. Vegirnir til Washington báru þess gleggstan vott. Manntjón 460 fallnir, 1124 særðir, 1262 féllu í hendur sunnanmönnum. Þeirr á meðal var einn áhorfenda, þingmaður einn frá New York, sem mátti svo dúsa í Libby-fangelsi í Richmond. Suðurríkjamenn misstu 378 menn, 1489 særðust, og aðeins 30 voru teknir höndum.

Ritstjórar blaðanna stungu upp á því að Lincoln semdi vopnahlé við Suðurríkjamenn og síðan frið við þá. Stríðið hélt þó áfram og voru 400 þúsund menn kvaddir til vopna í Norðurríkjunum.

Orrustan við Bull Run, var Norðurríkjunum alvarleg áminning. Hún færði þeim heim sannin um, að fyrir höndum væri löng og mannskæð styrjöld. Hún sannfærði einnig bæði stjórnmálamenn og almenning um, að orrustur eru hvorki íþrótta né hestamót. Og hún leiddi líka í ljós, að Norðurríkin skorti dugandi hershöfðingja.

Robert Edward Lee er að mörgum talinn besti herforingi sem Bandaríkin hafa alið af sér. Hernaðarsnilld hans var án efa mesti einstaki þáttur þess að Suðurríkjasambandið hélt út fjögur ár í stríði við algert ofurefli.

Styrjöldin kostaði ofboðslegar blóðsúthellingar, heilir landshlutar voru flakandi í sárum. Um 620 þúsund manns létu lífið, ýmist fyrir vopnum, í fangabúðum, af drepsóttum eða vosbúð. Þar af voru um 360 þúsund Norðurríkjamenn og 260 þúsund Suðrríkjamenn.

Viku eftir að borgarastríðinu lauk var Abraham Lincoln myrtur.

Byrjunin á borgarastríðinu minnir um nokkuð á byrjunina á olíustríðinu í Írak í dag. Almenningsálit, návígi fjölmiðla, hernaðaráætlanir, mótspyrna og slakur stjórnandi.

Heimild:

Bókin Abraham Lincoln eftir Thorolf Smith

Snara um hálsinn

"Karlmenn eru eina dýrið sem byrjar daginn á því að hengja snöru um háls sér."

Mælti einhver gáfaður heimspekingur eflaust með slaufu.

Fínt að fá þessa frétt frá Bretlandi. Mér líður ávallt illa með hálstau um hálsinn og nota þau aðeins þegar  nauðsyn krefur.  Ég verð svo stífur í hálsinum og mér líður illa þegar þrengt er að hnútnum.  Því notaði ég setninguna hér fyrir ofan  ef einhver gerir athugasemd við hálsbindisleysi mitt.  Nú get ég borið fyrir mig rökunum um að þau séu örveruhreiður. Ég get tekið undir það að bindi séu smitberar, ég hef verið mjög heilsuhraustur.

Bindi eru því stórhættulegt stöðutákn. 

Hálsbindi bönnuð á breskum sjúkrahúsum

Flottustu fótboltastelpur í heimi!

Flottustu fótboltastelpur í heimi! - Slagorð hjá Sjónvarpinu fyrir HM-kvenna í knattspyrnu sem haldið er í Kína.  Það vantar bara stúlkur frá Íslandi til að fullyrðingin haldi! Ég hef trú á að Ísland geti komist í úrslitakeppni heimsmeistarakeppni kvenna í einni af næstu þrem HM-keppnum.

Nú stendur yfir leikur Englands og Argentínu.  Ég fylgist með ensku stúlkunum. Uppistaðan í liðinu er frá meisturum Arsenal en það hefur verið yfirburðalið á Englandi síðustu ár. Níu leikmenn af 21 manna hóp eru frá  Arsenal og í leik Englands og Þýskalands sem endaði jafnt, 0-0, spiluð 7 leikmenn frá Arsenal.  Kíkjum á byrjunarlið Englands gegn Argentínu á Chengdu leikvanginum.

1 Rachel BROWN                    Everton
12 Anita ASANTE                 Arsenal
6 Mary PHILLIP                   Arsenal
2 Alex SCOTT                      Arsenal
3 Casey STONEY                    Chelsea
5 Faye WHITE (C)               Arsenal
8 Fara WILLIAMS                   Everton
10 Kelly SMITH                    Arsenal
16 Jill SCOTT                          Everton
9 Eniola ALUKO                      Chelsea
11 Rachel YANKEY               Arsenal 

Í leiknum sem stendur yfir núna eru sex leikmenn frá Arsenal en Katie Chapman er í leikbanni.

1 Arsenal  22 22 0 0 119 10  66
2 Everton 22 17 1 4   56 15  52

Árangur Arsenal í kvennaknattspyrnu er mjög athyglisverður. Hann er glæsilegri en árangur Valsstúlkna á Íslandsmótinu í ár. Þær ensku sigruðu í öllum keppnum á Englandi og unnu UEFA bikarinn. Eina áfallið sem þær lentu í var jafntefli í Evrópukeppninni en það kom ekki að sök.

England hefur mikla yfirburði í leiknum í dag. Þýskaland vann Argentínu 11-0. Staðan í hálfleik er 2-0 fyrir England. Eva Gonzalez með athyglisvert sjálfsmark á 9. mínútu og Jill Scott skömmu síðar skoruðu mörkin tvö.  Leikurinn er opinn, færi Englands í fyrri hálfleik eru 15 en Argentínu 6. Staðan í boltameðferð er 64%-36%.

Liðin frá Evrópu eru skrefi á undan liðunum frá Afríku, Asíu, Ameríku og Eyjaálfu í styrkleika. Allt stefnir í að Þýskaland og England fari áfram í 8-liða úrslit. Japan og Argentína sitja eftir með sárt ennið.

Vefsíða keppninnar

Arsenal á toppnum

Það var gaman að fylgjast með nágrannaslagum í norður London, leik Tottenham og Arsenal á Sportbarnum í gær. Það voru margir stuðningsmenn Tottenham í kringum okkur á barum og var andinn góður. Leikurinn byrjaði vel fyrir Spurs, þeir komust í forystu eftir korter en áhorendur voru hógværir. Höfðu lært af reynslunni að lið Arsenal gefst aldrei upp. Robbie Keane var ekki hátt skrifaður meðal íslenskra stuðningsmanna Tottenham og einnig virtist Martin Jol vera umdeildur stjóri. Ekki jukust vinsælir hans eftir leikinn. Jafntefli á White Hart Lane eru fín úrslit, sérstaklega eftir landsleikjahlé. Arsenal endaði leikinn með góðum 1-3 sigri, þar sem miðjumaðurinn Fabregas og fyrirliðinn kraftmikli Kolo Toure fóru fyrir liðinu. Niðurstaða dagsins var ánægjuleg.

                           L     U     J     T     Mörk      Stig
1.     Arsenal       5     4     1     0     10:4      13
2.     Liverpool     5     3     2     0     11:2      11
3.     Man. Utd     6     3     2     1       4:2      11
4.     Chelsea      6     3     2     1       7:6      11

Arsenal er í toppsætinu í ensku úrvalsdeildinni en það sem skiptir meztu máli er að vera á toppnum á sunnudaginn 11. maí 2008 klukkan fjögur.  Risarnir fjórir eru loks komnir á sinn stað í töflunni og fjögurra hesta kapphlaupið er hafið. Vonandi verður spenna fram í síðasta leik.

Það er kalt á toppnum eins og á Esjunni í morgun. Ég ætlaði í gönguferð á fjallið í dag en fresta henni til næstu helgar. Hins vegar eru hinir ungu leikmenn Arsenal hungraðir og vilja hvergi annars staðar vera en á toppnum.

Arsenal er búið að fá á sig fjögur mörk á leiktíðinni. Það er full mikið. Tvö fyrirstu voru gjafamörk frá þýska landsliðsmanninum Lehmann. Þriðja markið var óverjandi galdramark frá Kanu og markið í gær var beint úr aukaspurnu. Það á að vera hægt að minnka lekann. 

En góðum fréttum fylgja slæmar fréttir. Slæmu fréttir helgarinnar voru að Ungmennafélagið Sindri féll úr 2. deild eftir ósigur gegn Hetti á Egilsstöðum. Úrslitin voru gersamlega út í hött, 3-1 tap og uppskeran 32. sætið á Íslandsmótinu. Nú er bara að spýta í lófana. Byggja upp gott lið um leið og knatthöllin rís á Hornafirði. Taka svo þriðju deildina með trompi.

Ísland, Hong Kong norðursins

“Norður-Íshaf er hið eiginlega Miðjarðarhaf”!

Svo mælti Vilhjálmur Stefánsson (1879-1962), landkönnuður og mannfræðingur.

Íshafsleiðin  liggur á milli Norður-Atlantshafs og Kyrrahafs. Án hafíss væri þessi stysta leið milli heimshafanna tveggja fjölfarnasta siglingaleið jarðar!

Íshafsleiðin, var fyrst farin af rússneska skipinu Alexander Sibiryakov árið 1932. Frá Íslandi er þessi siglingaleið til Tokyo innan við 7000 sjómílur (18-20 dagar), en ef farið er um Suezskurðinn er hún um 12,500 sjómílur (34-36 daga sigling).

Í marz árið 2003  sótti ég málstofu hjá Umhverfisstofnun Háskóla Íslands. Þar voru frummælendur frummælendur Gestur Ólafsson, arkitekt og skipulagsfræðingur hjá Skipulags- arkitekta- og verkfræðistofu ehf. og Dr. Þór Jakobsson, veðurfræðingur og verkefnisstjóri hafísrannsókna hjá Veðurstofu Íslands.  Fyrirlestur Gests og Þórs hafði mikil áhrif á mig og ég hef fylgst vel með umræðu um norðurheimsskautið síðan. Athyglisverðast fannst mér hve harkalega Gestur gagnrýndi stjórnvöld fyrir sofandahátt í aðgerðum varðandi siglingar um norðrið. Prestssonurinn var ekki eins gagnrýninn á stjórnvöld en sagði skemmtiega sögu frá Hveragerði. Þar var hann í afslöppun í hver. Þar var einnig staddur Japani. Sá erlendi endaði umræðuna ávallt á setningunni, "Ísland, Hong Kong norðursins". Jakob gekk á hann og spurði hvað hætt meinti. Japaninn benti honum á að þegar hægt yrði að sigla yfir Norðurpólinn þá myndi opnast miklir möguleikar fyrir Ísland. Síðar kom í ljós að sá erlendi var með margar gráður í hagfræði.

Vegna legu landsins á miðju Atlanshafi milli Evrópu og Ameríku skapast miklir möguleikar á að gera Ísland að öflugri umskipunarhöfn – Hong Kong norðursins, sérstaklega er horft til austurstrandar Bandaríkjanna. Einnig er hægt að aðstoða Rússa við að koma vörum sínum á markað, t.d. olíu, timbri og málmum.

Umskipunarhöfn

Í málstofunni lærði ég orðið umskipunarhöfn. En þar var sagt frá framtíðaráætlunum um siglinar um Íshafsleiðna.  Stefnan var sú að á árunum 2008-2010 verði flutt 10 milljón tonn um Íshafsleiðina og þó um Ísland færi ekki nema 5-10% af því þá yrði um gífurlega mikla flutninga að ræða.

Norðvesturleiðin hefur opnast vegna bráðnunar

Árnaðaróskir - Google rúllar upp leitarmarkaðnum

Til hamingju með daginn Googglarar!

"Gogglaðu bara", er orðin algeng setning á hinu íhaldsama Íslandi þegar leita skal upplýsinga á Netinu.
Google leitarvélin hefur verið í stórsókn síðustu árin. Í október 2002 var Google með 53,2% markaðshlutdeild. Nú er öldin önnur. Google leitarvélin hefur yfirburðarstöðu í Bandaríkjunum og sama gildir um öflugustu lönd Evrópu.

Kíkjum á markaðshlutdeild Google í Þýskalandi, Frakklandi og Bretlandi.

Með markaðshlutdeild upp á 88.5%, er Google  leiðandi leitarvél í Þýskalandi. Yahoo hefur 3.4%, síðan kemur þýska leitarvélin ISP T-Online (2.2%), MSN (1.4%) og AOL (1.3%).

Í Frakklandi er sama staða. Með 89.79%, hefur Google  yfirburða stöðu. Yahoo kemur með 3.14%. MSN nær í 2.48%, frönsku leitarvélarnar ISP's Orange og Free ná 1.89% og 0.72%.

Sama er uppi á tengingum í Bretlandi. Google hefur markaðshlutdeild upp á 79.38%. Yahoo nær í 7.72%. Með 4.48% nær Ask.com í þriðja sætið. Leitarvélar Microsoft's  MSN og Live ná í 3.75% og 1.53% (samtals 5.28% fyrir leitarvélar Microsoft).

 

Því er nauðsynlegt fyrir íslensk fyrirtæki að vera sýnileg á Google ætli þau að ná árangri erlendis.

Leitarvélar gegna lykilhlutverki á Netinu og er stundum talað um að þær séu fimmta valdið, þið þekkið undirstöður lýðræðisins, framkvæmda-, löggjafar- og dómsvald. Fjölmiðlar eru stundum kallaðir fjórða valdið og leitarvélar það fimmta. Ef þú ert ekki  þar, þá ertu ekki til í Rafheimum!

Sagan um Google leitarvélina er dæmigerð fyrir fyrirtæki í upplýsingatækni.

Google var stofnuð um miðjan 10. áratug síðustu aldar af tveim guttum, Larry Page (24) og Sergey Brin (23) sem námu við Stanford háskólann. Markmið þeirra var að hanna hraðvirka, nákvæma og einfalda leitarvél. Þeir gerðu frumgerðina í heimavistinni hjá Larry í Stanford og síðla árs 1998 var starfsemin komin í bílskúr en mörg tölvufyrirtæki hafa byrjað á sama hátt. Þessi bílskúr hafði þó þann lúxus að hafa sjálfvirkan hurðaopnara.

Lykilinn að nákvæmi leitar hjá Google byggir  á algrími sem kallast PageRank en þar er skjölum raða upp eftir því hversu margar tengingar eða meðmæli eru í skjalið. Þar sem litið er á að ef síða A vísar í síðu B sé hún í raun að mæla með henni.  En Google skoðar einnig meðmæli  síðunnar A sem vísaði og skoðar meðmæli hennar. Síður sem fá mörg meðmæli eru taldar vera áreiðanlegri en síður sem færri vísa í og þeim er því raðað framar í leitarniðurstöðunum.

Kíkjum aðeins á PageRank algrímið.

PR(A) = (1-d) + d(PR(t1)/C(t1) + ... + PR(tn)/C(tn))

 

Tíu ár síðan lénið google.com var skráð