Ekkert Grímseyjarferjuslys í Hornafjörð

Í Eystrahorni í dag er frétt um bændur í Nesjum í Hornafirði sem stefnt hafa Vegagerðinni og ríkinu. Nesjabændur vilja hindra stórfellt umhverfis- og skipulagsslys í Hornafirði.

Ég hef ekki náð að fara í saumana á þessu máli en hrikalega eru veglínurnar ljótar á korti. Þetta eru hræðileg ör á fögru landslagi.  Hins vegar er krafan um öryggari og styttri hringveg 10-12 km góð og gild.

Ég treysti Nesjabændum betur en Vegagerðinni, sérstaklega eftir ævintýrið með Grímseyjarferjuna og afglöpin sem fyldgu henni hjá vegagerdin.is

En hver er bezta lausnin, hvað um jarðgöng?

Að vísu dýr en umhverfið nýtur vafans.

 

Laugavegur og La Laguna

Mikil umræða hefur verið um niðurrif gamalla húsa á Laugarvegi. Nú er mikil umræða út af því að  borgarráð hefur samþykkt niðurrif á húsum á Laugavegi 4 og 6. Íslendingar eru duglegir að afmá söguna og erfiðlega gengur að halda í 19. aldar götumynd Laugavegs. Þegar við ferðumst til annara landa förum við til að skoða gamlar glæsilegar byggingar með mikla sögu. Í nokkrum löndum er hægt að sjá heilu borgirnar, 500 ára byggingarsögu.

Á Tenerife er fyrrum höfuðborg eyjarinnar San Cristóbal de la Laguna. Borgin komst á heimsminjaskrá UNESCO árið 1999.  Árið 1497 stofnaði Alonso Fernández de Lugo borgina við lón uppi í dal í 550 metra hæð. La Laguna var höfuðborg til 1723 en þá fluttist stjórnsýslan til hafnarborgarinnar Santa Cruz. Nú er borgin biskupssetur og háskólabær með 30.000 stúdenta.   

Það var einkennileg tilfinning að vera í miðbænum í la Laguna á heitum júlídegi um síestuna. Mér leið eins og ég væri statisti í S-Amerískri bíómynd. En la Laguna var notuð sem módel af Kólumbusi fyrir margar  borgir í Ameríku. Borgin var skipulögð frá byrjun og takmarkaðist ekki af víggirtum veggjum.  La Laguna hefur varðveist vel og er miðbærinn upprunalegur. Borgin skiptist í tvo kjarna. Upprunalega óskipulagða Efra þorp og Neðra þorp en það var skipulagt frá grunni og byggðist upp á 16 til 18. öld. Það hafði breiðar götur og opin svæði með nokkrum glæsilegum kirkjum einnig byggingar fyrir almenning, sjúkrahús, skóla og stjórnsýslu. Síðan komu íbúðarhús þar á milli.

París byggðist óskipulega upp. Byggingar frá þessum tíma eru ekki til í menningarborginni. Stjórnvöld á Tenerife eru meðvituð um þarfir ferðamanna og hafa sóst eftir að fá útnefningu heimsminjaskrár UNESCO. Þau líta á útnefninguna sem tákn "emblem" sem gerir eyjuna sögulegri í hugum ferðmanna. Þeir vita að því verður ekki bjargað sem búið er að farga.

Hér er umsögn heimsminjanefndar UNESCO 1999.

"San Cristóbal de la Laguna was the first non-fortified Spanish colonial town, and its layout provided the model for many colonial towns in the Americas." 

Íslendingar þurfa að vera íhaldsamir á byggingasögu sína og halda í 19. aldar götumynd Laugarvegsins. Við hljótum að geta það fyrst aðrar borgir geta haldið í 15. aldar borgarmynd. Ferðamenn hafa mikinn áhuga á  húsum með menningarsögulegt gildi sem birtir okkur sögu íslenskrar byggingalistar á ýmsum tímaskeiðum.

Það var eins gott fyrir íbúa La Laguna að Vilhjálmur Vilhjálmsson var ekki borgarstjóri þar. Hann hefði  rifið niður miðbæinn til að þóknast öflugum byggingarfyrirtækjum. 

Heimildir: 

Vefur heimsminjaskrár UNESCO

 

 

 

 

 

 

 

 

 

 

 

 

 

 

 

 

 

Á Herradores göngugötunnu um miðja síestuna. Allt lokað, aðeins barir og voru karlmenn í meirihluta. Nokkrar íbúðir eru með svölum.

 

 

 

 

 

 

 

 

 

 

 

 

 

 

 

 

 

Fyrir framan La Concepción (1502). Kirkjan í Efra þorpinu og var íbúum sem mest voru hermenn leyft að byggja eftir eingin smekk. Það mynduðust oft umferðahnútar í borginni og voru Spánverjar duglegir að taka flautukonsert.

Hornfirðingahólmi

Mikið kapphlaup er komið í landnám á norðurpólnum. Rússar flögguðu fána neðansjávar undir íshellunni á  pólnum í síðustu viku. Kanadamenn og Danir láta sitt ekki eftir liggja. Norðmenn og Kanar eru í startholun. En hver á Norðurpólinn?  Allur heimurinn að sjálfsögu. Þegar ísinn fer þá á hafið að verða alþjóðlegt siglingarsvæði.

Lítil eyja er í Öskjuvatni að nafni Hornfirðingahólmi. Hún er nefnd eftir Hornfirðingum sem fyrstir sáu hana. Þeir komu gangandi yfir Vatnajökul og þá var hún rjúkandi og nýmynduð eftir gjóskugos sumarið 1926.

Þessir þrír ungu bændasynir og landnámsmenn úr Hornafirði sem 15. júlí 1926 tóku sig til og gengu á skíðum upp úr Hornafirði við Svínafellsjökul og norður yfir Vatnajökul og þaðan áfram til Akureyrar voru: Helgi Guðmundsson frá Hoffelli, Unnar Benediktsson frá Einholti og Sigurbergur Árnason frá Svínafelli. Til baka komu þeir sömu leið af Gæsaheiði 28. júlí. Mun þessi för lengi talin ein sú fræknasta á hornfirskum slóðum.

Ef Rússar ná að gera tilkall til stórs hluta af Norðurpólnum og hin löndin sem liggja að pólnum skipta restinni á milli sín þá geta Hornfirðingar eflaust gert tilkall til Hornfirðingahólma í Öskjuvatni.  Hvernig á að nýta hann er svo allt annað mál.

 

Svona sá listamaðurinn og fjallamaðurinn Guðmundur Einarsson (kenndur við Miðdal) fyrir sér eldgosið í Öskju 1926. Þá gaus 50 milljón rúmmetra af gjósku í Öskjuvatni.

Mynd skönnuð úr bókinni Íslenskar eldstöðvar. 

 

 

 

 

 

 

 

 

 

Heimildir:

Perlur í náttúru Íslands, Guðmundur Páll Ólafsson, bls. 270.  

Jöklaveröld - Náttúra og mannlíf, Sverrir Scheving Thorsteinsson, bls. 260. 

Íslenskar eldstöðvar, Ari Trausti Guðmundsson, bls. 39. 

Górillur drepnar af tómri mannvonsku

Í Morgunblaðinu í dag er frétt um dráp á grórillum í útrýmingarhættu sem vekja óhug. Fyrirsögnin er "Drepin af tómri mannvonsku"

Í fréttinni er greint frá drápi á fjórum fjallagrórillum í Kongó. Þær voru skotnar í hnakkann. Aftaka, hótun til þjóðgarðsvarða en 150 verðir liggja í valnum. Áætlað er að um 700 fjallagróillur séu til í heiminum. Þar af eru 380 í Virunga þjóðgarðinum í Kongó.

"Hvers konar maður getur gert þetta?" hrópaði einn þjóðgarðsvarðanna sem komu að hræjunum. Hann svaraði síðan spurningunni sjálfur. "Engin skepna myndi gera þetta."

Fyrir stuttu var ég staddur í Loro Parque dýragarðinum en þar voru sjö karl górillur til sýnis. Þegar maður sá þessi mögnuðu dýr bakvið gler tengdist maður þeim tilfinningaböndum. Enda er munurinn á DNA genamengi manna og górillna aðeins 1,6%. Því stuðaði þessi frétt mig. Við mennirnir megum ekki þurrka þessi merkilegu dýr út.

En hvernig dettur fólki svona í hug? Eru það bara illa uppaldir veiðiþjófar sem hafa þessar hugmyndir? Nei, svo er ekki. Rifjast upp fyrir mér grein sem alþingismaðurinn Bjarni Harðar skrifaði í Morgunblaðið til að halda hvölum í skefjum. Sumar hvalategundir eru skilgreindar í útrýmingarhættu eins og górillurnar. Það sem Bjarni stingur uppá í grein frá 13. júlí "Kjarkleysi í kvótamálum" og stígur á strik:

"Vandræðalegast hefði ef til vill verið ef rétt er að ekki megi finna markaði fyrir hvalinn, en þá mætti vel ræða þá hugmynd að drepa skepnur þessar á afmörkuðum svæðum án þess að flytja skrokka þeirra í land."

Er þetta ekki nákvæmlega það sama og veiðiþjófarnir í Kongó er að gera? Svona gera skepnur ekki!

 

 

 

 

 

 

 

 

 

 

 

 

 

 

 

 

 

Górilla í Loro Parque (páfagaukagarðingum) bakvið öryggisgler. Skömmu síðar sneri hún silfruðu baki í mannfjöldann og klóraði sér. Vakti atferli mannapana mikla hrifningu. Í þessum dýragarði á Tenerife eru margar dýrategndir sem eru útrýmingarhættu. 

Gunners 50 stærstu stundir

Í fríinu sumar hefur vefurinn arsenal.com birt daglega stærstu stundir stórveldisins Arsenal. Fengnir voru spekingarnir Martin Tyler, Alan Smith, Frank McLintock, Tom Watt og sagnfræðingur Arsenal Iain Cook. Þeir settu niður á blað mörg ógleymanleg atvik í sögu klúbbsins. Síðan kusu tíuþúsund stuðningsmenn um röðina.

Kíkjum á tíu bestu stundirnar.

1. 2004, Arsenal spilar 49 úrvalsdeildarleiki í röð án þess að tapa leik.

2. 1989, Mark Michael Thomas í blálokin í lokaleik á Anfield og gerði Arsenal að Englandsmeisturum.

3. 2004, "Ósnertanlegu" vinna meistaratitilinn á White Hart Lane.

4. 1996, Arséne Wenger ráðinn stjóri Arsenal

5. 1971, Arsenal leggur Liverpool að velli á Wembley og vinnur fyrstu tvennuna.

6. 2002, Mark frá Wiltord tryggir meistaratitil og þriðju tvennuna.

7. 2006, Fyrsta enska knattspyrnufélagið til að vinna Real Madrid á Spáni.

8. 2006, Flutningur frá Highbury á Emirates Stadium.

9. 2005, Henry slær markamet Wright í Evrópuleik  gegn Sparta Prag.

10. 2003, 1-5 sigur á Inter Milan á San Siro eftir magnaða frammistöðu Henry. 

Hægt er að sjá topp 50 listann hér: 

Mér líst vel á þennan lista. Ég hef upplifað allar tíu bestu stundirnar. Þó man ég lítið eftir tvennuni 1971 en áhugi minn á Arsenal kviknaði eftir það afrek. Það hefði ekki komið mér á óvart að víxla á  tveim efstu sætunum. Að mínu mati er sigurinn góði á Liverpool 1989 toppurinn. Það verður ógleymanlegt kvöld.  Ég á trefil þar sem 1-5 sigurinn er greyptur í.  Afrek númer 7 finnst mér vera ofarlega á lista. Real Madrid var svo slakt lið á þessum tíma, vængbrotið með Beckham innanborðs.

Ég hef verið mikill aðdándi Herbert Chapman. Nafn hans kemur fyrst fyrir í 18. sæti en þá var hann ráðinn stjóri Arsenal árið 1925. Hann byggði upp stórveldið. Hann tapar á því að þeir sem þekktu vel til hans eru flestir komnir undir græna torfu.

Spá: Arsenal - Fulham 3 : 1

Ég skrifaði á árum áður upphitanir fyrir leiki Arsenal á vefinn arsenal.is   En spjallverjar á arsenal.is hafa haldið áfram að skrifa og er mjög góð upphitun eftir SBrG á spjallvefnum. Það var ávallt gaman að skoða söguna síðan Arsene Wenger tók við liðinu í september 1996. Það var alltaf einhver formúla fyrir öllu.  Oft mynduðust raðir, t.d. skora mörk í hverjum leik eða tapa ekki leik eitt keppnistímabil. Einnig var oft hægt að finna út markaskora út frá sögunni. Í tilefni að því að enski boltinn er að hefjast um helgina þá ætla ég að rifja upp gamla takta.

Loksins, loksins. Enski boltinn er byrjaður að rúlla. Á sunnudaginn verður opnunarleikurinn á tímabilinu 2007/2008 á Emirates Stadium og fáum nágrannana frá Fulham í heimsókn. Það er ekki hægt annað en að vera bjartsýnn í byrjun móts. Tveir titlar í húsi, Emirates Cup og  Amsterdam Cup. Svo eru leikmenn farnir að þekkja búningsklefana á Emirates Stadium.

Arsenal hefur gengið vel á móti Fulham í síðustu viðureignum.  Liðin hafa sex sinnum glímt á heimavelli Gunners síðan Úrvalsdeildin var stofnuð,  89% árangur. Mörg mörk hafa verið skoruð, markatalan 15-4.
          
23/02/2002   Arsenal   4 - 1  Fulham  38.029  (Lauren, Vieira, Henry, Henry)                          
01/02/2003   Arsenal   2 - 1  Fulham  38.050  (Pires 17, 90)
30/11/2003   Arsenal   0 - 0  Fulham  38.063
26/12/2004   Arsenal   2 - 0  Fulham  38.047  (Henry 12, Pires 71)
24/08/2005   Arsenal   4 - 1  Fulham  37.867  (Cygan 32, Henry 53 og 82, Cygan 90)
29/04/2007   Arsenal   3 - 1  Fulham  60.043  (Baptista 4, Adebayor 84, Gilberto 87)

Það var  góður endasprettur hjá Arsenal í vor. Baptista skoraði snemma leiks. Heiðar Helguson kom inná á 60. mínútu og stuttu síðar jafnaði Davies fyrir Fulham. Þá fundu Arsenalmenn loksins gírinn og tvö mörk komu í lokin.

Cygan var maður leiksins árið 2005. Hann skoraði tvö mörk í leiknum en alls skoraði hann þrjú mörk á fjórum árum hjá Arsenal. Cygan fór til Villarreal fyrir 2 milljónir punda í ágúst 06.

46 Íslendingar voru á 0-0 leiknum 2003. Voru þeir í skipulagðri hópferð með Arsenalklúbbnum. Edvin Van der Sar var stórkostlegur og höfðu leikmenn Arsenal skorað í 45 heimaleikjum fyrir þann leik.

Leikurinn í febrúar 2003 var minnisstæður fyrir að Pires skoraði sigurmark í lokin en allt virtist stefna í jafntefli. Það var fínn undirbúningur fyrir Þorrablót það árið.

Líklegt byrjunarlið

Líklegt byrjunarlið gegn The Cottagers á sunnudaginn 12. ágúst klukkan 11.

             Lehmann
Sagna Toure Gallas(c)  Clichy

Eboue Fabregas Hleb Roiscky 

         v Persie Eduardo

Stjóri: Le Boss   (617 leikir, 350 sigrar (57%), 111 jafntefli og 156 óvænt töp)

Einn Arsenalmaður er hjá Fulham,  Þýski bakvörðurinn Moritz Volz. Hann kom 17 ára til félagsins árið 2000 og var  til  2004 en þá  fór hann til Fulham.

Spáin 

Spái 3-1 sigri. Setjum mark á Brasilíumanninn Eduardo en það var samba sveifla á Emirates  en Frökkum gekk vel að skora á móti Fulham á Arsenal Stadium. Gallas og Clichy verða að halda franska merkinu á lofti.

Staðan

1.  Arsenal   0 0:0 0

9.  Fulham   0 0:0 0 

Arsenal leiðir mótið í byrjun. Vonandi heldur liðið forystunni áfram. En árið 1914 var nafni liðsins breytt í The Arsenal. Hét áður Woolwich Arsenal. Herbert Chapman notaði síðan Arsenal og var ein röksemdin sú að liðið væri efst í stafrófsröðinni.  

Af Fulham er það helzt að frétta að þeir réðu til sín Lawrie Sanches í lok tímabilsins í fyrra. Hann náði að bjarga þeim frá falli með góðum sigri á vængbrotnu liði Liverpool. Í sumar hefur hann verið duglegur að kaupa til sín Norður-Írska leikmenn en hann var stjóri landsliðsins. Honum gekk mjög vel með landsliðið í Evrópukeppninni en þeir byrjuðu samt á 0-3 tapi gegn Íslendingum.  Heiðar Helguson spilaði með Fulham þrjá leiki við Arsenal en hann er nú kominn til Bolton.

Liðin hafa glímt 41 sinnum síðan 1904. Arsenal unnið 29 (71%), samið um 6 jafntefli og tapað 6 leikjum. Markatala 89 gegn 48. Fulham hafði ekki unnið leik síðan 1966 en það náðist að klúðra þeirri seríu í fyrra.

Leikurinn verður sýndur á Sýn2 og Ölveri, heimavelli Arsenalklúbbsins á Íslandi. 

Heimildir:

www.soccerbase.com  www.arsenal.is - The official illustrated history Arsenal 1886-1996 Phil Soar and Martin Tyler.

Virkni hugbúnaðar

Það var fróðlegur hádegisfyrirlestur sem ég var á í Háskóla Reykjavíkur í gær. Pétur Orri Sæmundsen frá Sprett fjallaði um Agile og kröfur.

Agile samfélagið á Íslandi er að gera góða hluti í að breiða út agile hugmyndir og aðferðir í hugbúnaðarþróun. Trú þeirra er að kvik aðferðafræði margfaldi árangur og skilvirkni í hugbúnaðarverkefnum. Einnig að aðferðin verði sjálfgefin í allri hugbúnaðarþróun innan fárra ára.

Eitt af lykilatriðum í kvikri hugbúnaðarþróun lágmarka breytingar. Ná öllu rétt í fyrsta skipti. Til þess þarf að farmkvæma kröfugreiningu, forgangsraða kröfum og hafa góð samskipti milli viðskiptavins og þróunarteymis.

Það var merkilegt að sjá rannsóknarniðurstöðu Standish Group um virkni (feature) í kerfi eða forriti.

•   45%  Aldei notuð
•   19%  Sjaldan
•   16%  Stundum
•   13%  Oft
•     7%  Alltaf

20% af virkni forrita er því oft eða alltaf notuð, 64% sjaldan eða aldrei.  Það bendir til að viðskiptavinurinn hafi farið offari í hugarfluginu.  Gott dæmi um forrit sem þetta gildir um er Word.

Hvað notar þú lesandi góður mikið af virkni Word?

Agile byggir á samskiptum. Sálfræðin er komin í hugbúnaðargerð.

  

Jákvæðir landsmótsgestir

Það kemur mér ekki á óvart að Unglingalandsmótið hafi gengið vel fyrir sig. Mótsgestir eru mjög jákvæðir og skemmtilegir. Ég hef aðeins aðstoðað Albert Eymundsson, útbreiðslustjóra í Hornafjarðarmanna við að kenna fólki Hornafjarðarmanna. Þannig hef ég fengið að kynnast gestum. Landsmótsgestir hafa streymt í kennslutjaldið og það hefur verið mjög gaman að kenna jákvæðu fólkinu galda spilsins. Áhuginn er mikill fyrir  Manna og allt stefnir í metþátttöku.

Í dag verður kíkt á bændaglímu í stóra tjaldinu. Fylgst með mótorcross móti. Einnig horft á nokkur landsmótsmet í frjálsum og góðar rispur í fótbolta. Eftir það verður síðasta þrautin í Þórbergsleikum káruð og afreksmiða skilað inn.  Kl. 15 verður tekið í spil í Hornafjarðarmanna og eftir það býður UMFÍ upp á afmælistertu í tilefni af 100 ára afmæli.  Í kvöld verður hlustað á tónlist og flugeldasýningu.  Það er því margt í boði fyrir fólk sem ekki er á keppnisaldri.

Þegar frábært skipulag, ágætt veður, vinsamlegir mótshaldarar, fórnfúsir sjálfboðaliðar og jákvætt fólk mætir á svæðið, þá hlýtur útkoman að verða góð.

Hittumst á Hornafirði

Það er fín stemming á Hornafirði. Hornfirðingar eru vel gíraðir og ætla að taka vel á móti gestum sínum. Umgjörðin fyrir 10. unglingalandsmót UMFÍ er mjög góð. Nýjir og fallegir keppnisvellir fyrir frjálsíþróttir og krakkablak. Búið er að hanna skemmtilega mótorcrossbraut. Stórt landsmótstjald fyrir kvöldvökur, glímur og Hornafjarðarmanna. Tjaldþorp er ristið í miðbænum, þar er m.a. Þórbergstjald. Veðrið í dag er búið að vera densilegt, léttskýjað og gola. Fjörðurinn skartaði sínu fegursta í kvöld, ASA 1 og tíu gráður í plús.

Það fjölgar á tjalstæðinu og á vegagerdin.is voru taldir 1.379 bílar frá miðnætti við Kvísker. Í Hvalnesskriðum eru 915 bílar búnir að fara um. Sambærilegar tölur fyrir Öxnadalsheiði eru  2.314 bílar.

Keppni á unglingalandsmótinu hefst árla í fyrramálið, kl. 8.00 með golfmóti á frábærum Silfurnesvelli. Veðurspáin fyrir helgina er bærileg, úrkoma á morgun og skúrir um helgina.

Það verður gaman að keppa á Hornafirði um helgina.