Örugg fram í maí 2012

Gott að fá þetta vísindalega staðfest með spennu í berginu.  Afkomumælingar sýna að 9 til 12 metrar bætast ofan á Mýrdalsjökul yfir veturinn.

Vísindamennirnir sem skrifa í ScienceNews telja umdeildu gosin með sem komu öll í júlí, óróann árið 1955,  1999 og núna í ár en gosið 1918 var alvöru.

Kíkjum á síðustu eldgos í Kötlugjánni.

Ár	Dagsetning	Goslengd	Hlaup	Athugasemd
1918	12. október	3 vikur +	24	Meiriháttar gos
1860	8. maí	3 vikur	20	Minniháttar
1823	26. júní	2 vikur +	28	Minniháttar
1755	17. október	4 mánuðir	120	Risagos
1721	11. maí	Fram á haust	>100	Mikið öskugos
1660	3. nóvember	Fram á næsta ár	>60	Öskufall tiltölulega lítið
1625	2. september	2 vikur	13	Minniháttar, flóð frá 2.-14. sept.
1612	12. október			Minniháttar
1580	11. ágúst			Öflugt, Urðu þytir í lofti

En talið er að um 15 önnur eldgos hafi orðið í Kötlugjánni frá landnámi.

Allt stemmir þetta og því getum við sofið róleg yfir Kötlu framí maí 2012. Október er líklegastur.

Heimildir:
Katla, saga Kötluelda, Werner Schutzbach, 2005
Jöklar á Íslandi, Helgi Björnsson, 2009

 

Katla virkari á sumrin

Athugasemdir

[Emil Hannes Valgeirsson, 10.12.2011 kl. 15:57]

Kannski má fara varlega í þessa reglu. Ég ímynda mér allavega að í maí sé megnið af vetrarsnjónum ennþá á jökli.

[Júlíana Magnúsdóttir (IP-tala skráð) 10.12.2011 kl. 19:46]

Minni á Sturluhlaup (Gosið 1311 sem eyddi Lágeyjarhverfi í Mýrdalssandi) en þetta gos kom á Þorláksmessu samkvæmt sögnum. Svo ekki fagna of snemma...

[Sigurpáll Ingibergsson, 10.12.2011 kl. 22:43]

Júlíana:  Góð pæling. Í bókinni Jöklar á Íslandi segir um Sturluhlaup. "Jarðfræðingar hafa hins vegar ekki fundið gjóskulag frá þessum tíma og talið er að Lágeyjarhverfi hafi ekki eyðst fyrr en í hlaupi um 1500, sama hlaupi og eyddi bænum Dynskóum."

Þannig að hlaupið gæti verið rangt tímasett en sagan af Sturlu sá sem hlaupið er kennt við og átti að hafa bjargast ásamt barni í vöggu á ísjaka sem barst til hafs og síðar á land er stórmögnuð.

Emil: Já, það virðist vera að maí hafi einhvern jafnvægispunkt og þá geti einhver gikkur hleypt öllu af stað. En ég hef ekki séð gögn um snjóþykkt í mars og apríl.