Hengill (803 m)

Hengill kominn í fjallasafnið. Fjallið er (803 m) móbergs- og grágrýtisfjall. Fór með hörku göngugengi, Dóru systur, Dóra, Mána og Guðmundi óhefðbundna vetrarleið á Vörðu-Skeggja frá Dyradal og inn eftir Skeggjadal. Við vorum klukkutíma upp og hlupum á hælnum beint niður. Ævintýraferð í ágætis veðri. Gott skyggni en vindur í bakið á uppleið.

Meðal sérkenna þessa svæðis eru óvenjulegir aflokaðir og stundum afrennslislausir dalir sem eru rennisléttir í botninn; - svona eru t.d. Innstidalur, Marardalur, Dyradalur og Sporhelludalur. Þeir eru taldir vera myndaðir milli móbergsfjalla, eiginlega stíflaðir uppi, en hafa fyllst í botninn af seti. Í Marardal voru naut geymd fyrrum með því að hlaða fyrir þröngt einstigi sem er eina færa leiðin inn í dalinn.

Útsýni af Heglinum var ágætt. Tignalegur Eyjafjallajökull í austri, Tindfjallajökull og fannhvít Hekla. Síðan kom Þingvallafjallgarðurinn með sínum frægu fjöllum, fellum, tindum og súlum. Augað endaði á Esjunni en á bakvið sást drifhvít Skarðsheiðin. 

Það var athyglisvert að sjá eyjarar í Þingvallavatni, Nesey og Sandey, voru í beinu framhaldi af dölunum sem nefndir eru hér fyrir ofan. Þær eru líklega á sprungu sem liggur í norðaustur.

Mynd tekin í Skeggjadal sem sýnir leiðna upp. Rætur fjallsins eru í 400 metra hæð og hækkun svipuð.

Athugasemdir

[Emil Hannes Valgeirsson, 9.5.2009 kl. 22:43]

Það er nefnilega það. Þarna uppi var ég líka í dag ásamt félaga mínum og við hittum ykkur á toppnum þannig að ekki er maður glöggur á bloggvini sína í návígi.

Það væri gaman að prófa þessa leið ykkar einhverntíma, en við fórum lengri leiðina í gegnum Innstadal.

[Sigurpáll Ingibergsson, 10.5.2009 kl. 10:22]

Skemmtileg færsla.

Svona getur heimurinn verið lítill.    Ég ætla að ganga frá Innstadal á næstunni. Mér leist mjög vel á slóðina eftir ykkur og klettableltið sem þið fóruð meðfram rétt áður en komið er að Vörðu-Skeggja hlýtur að vera stórbrotið á sumrin.

Hittumst kanski á næsta fjalli.