Hólárjökull 2015

Jöklarannsóknir mínar halda áfram. Ávallt þegar ég keyri framhjá Hólárjökli sem var einn af tignarlegum skriðjöklum úr Öræfajökli, þá smelli ég ljósmynd af honum. Hólárjökull er rétt austan við Hnappavelli. Hólá kemur frá honum.

Fyrri myndin var tekin þann 16. júlí 2006 og sú nýjasta þann 5. ágúst 2015.  Það sést glöggt að jökultungan hefur styst og jökullin þynnst, nánast horfið.  Rýrnun jöklanna er ein afleiðingin af hlýnun jarðar. Ég spái því að jökultungan verði horfin innan fjögurra ára. Hlutirnir gerast svo hratt.

Árið 2006 voru íslenskir jöklar útnefndir meðal sjö nýrra undra veraldar af sérfræðingadómstól þáttarins Good Morning America á bandarísku sjónvarpsstöðinni ABC. Íslensku jöklarnir urðu fyrir valinu vegna samspils síns við eldfjöllin sem leynast undir íshellunni.

Jöklarnir vita svo margt. Við erum að tapa þeim með ósjálfbærri hegðun okkar.

Hólárjökull, 16. júlí 2006. Jökulsporðurinn þykkur og teygir sig niður í gilið.

Hólárjökull, 5. ágúst 2015. Augljós rýrnun á 9 árum. Jökulsporðurinn er nær horfinn. En hann hefur í fyrndinni náð að ryðja upp jökulruðningi og mynda garð.

Sjá:
Hólárjökull 2007 - http://fiskholl.blog.is/blog/fiskholl/entry/259538/
Hólárjökull 2008 - http://fiskholl.blog.is/blog/fiskholl/entry/611572/
Hólárjökull 2009 - http://fiskholl.blog.is/blog/fiskholl/entry/911196/
Hólárjökull 2011 - http://fiskholl.blog.is/blog/fiskholl/entry/1192311/

Hólárjökull 2012 - http://fiskholl.blog.is/blog/fiskholl/entry/1253486/

Athugasemdir

[Torfi Stefánsson (IP-tala skráð) 12.8.2015 kl. 16:19]

Er þetta nú ekki frekar gleðilegt en sorglegt fyrir okkur Íslendinga. Litlu ísöldinni loksins að ljúka?

[Sigurður Antonsson, 12.8.2015 kl. 22:45]

Gaman að sjá þessar myndir og hin miklu breytingaröfl að verki. Hlýnun og kólnun jarðarparta hefur gengið í bylgjum. Nútíminn er aðeins örlítill hluti af þeirri sögu. Gefur manninum ólýsanleg tækifæri til að upplifa breytingar.

Fátt er eins skemmtilega framandi göngumanni á Sandfellsheiði en að heyra í framskriði Kotárjökuls. Hreyfingin sést ekki að ofan en ruðningurinn er á við margar stórvirkar jarðýtur á fullu í klappargrjóti. Ólík öfl að verki. Maðurinn fær að taka þátt í þeim og líkar vel.

Sammála Torfa, gleðilegt að sjá jöklana hopa og manninn ná að brúa og þeysast um Öræfagrundir. Nýir möguleika og áskoranir fylgja hlýnun jarðar. Sama hve margar ráðstefnur eru haldnar þá fáum við litlu breytt um gang náttúruaflana.

[Sigurpáll Ingibergsson, 13.8.2015 kl. 10:55]

Búin með auðlind­ir jarðar í ár,  13. ágúst.

http://www.mbl.is/frettir/taekni/2015/08/13/buin_med_audlindir_jardar_i_ar/

Jarðarbúar eru búnir að klára ársbirgðir af náttúrulegum auðlindum jarðar í dag, 13. ágúst. Tímapunkturinn þar sem menn fóru fram úr getu jarðarinnar til að standa undir þeim kom sex dögum fyrr í ár en í fyrra og er neysla manna nú á við 1,6 jarðir.

[Gunnar Gunnarsson (IP-tala skráð) 13.8.2015 kl. 13:53]

Göngum í vinnuna Sigurpáll