Auður er valtastur vina

Í dag fer fram Allsherjarþing Ásatrúarfélagsins og Veturnáttablót félagsins haldið í kvöld. En fyrsti vetrardagur er í dag.

Útrásarvíkingarnir og stjórn peningamála hefði átt að tileinka sér forna visku úr Hávamálum. Fornmenn vissu eins og kemur fram í Hávamálum að auður er “valtastur vina” og aðeins eitt getur lifað ævinlega og það er góður orðstýr.

Fullar grindur 
sá eg fyr Fitjungs sonum.
Nú bera þeir vonar völ.
Svo er auður
sem augabragð:
hann er valtastur vina.

Athugasemdir

[Þorsteinn Sverrisson, 27.10.2008 kl. 20:58]

Þessi vísa úr Hávamálum á ótrúlega vel við núna. Merkilegt hvað sannleikurinn er sígildur og óháður tíma.

Það má líka bæta við því sem Hallgrímur Pétursson sagði í Passíusálmunum:
Undirrót allra lasta
ágirndin kölluð er.
Frómleika frá sér kasta
fjárplógsmenn ágjarnir,
sem freklega elska féð,
auði með okri safna,
andlegri blessun hafna,
en setja sál í veð.

[Jóhannes Einarsson, 29.10.2008 kl. 09:04]

Svo eru það þessi höfð eftir honum Bjarti (HKL)

Hvað er auður, afl og hús

ef ekkert blóm vex í þinni krús