Hvalárvirkjun - eitthvað annað

Takk, takk Tómas,  Ólafur og Dagný fyrir að opna Ísland fyrir okkur á #LifiNatturan. Alltaf kemur Ísland mér á óvart. Stórbrotnar myndir sem sýna ósnortið víðerni sem á eftir að nýtast komandi kynslóðum. Við megum ekki ræna þau tækifærinu.

En hvað skyldu Hvalárvirkjun og hvalaskoðun eiga sameiginlegt?

Mér kemur í hug tímamótamyndir sem ég tók í fyrstu skipulögðu hvalaskoðunarferðunum með Jöklaferðum árið 1993. Þá fóru 150 manns í hvalaskoðunarferðir frá Höfn í Hornafirði.  Á síðasta ári fóru 354.000 manns í hvalaskoðunarferðir. Engan óraði fyrir að þessi grein ætti eftir að vaxa svona hratt.  Hvalaskoðun er ein styrkasta stoðin í ferðaþjónustunni sem heldur hagsæld uppi í dag á Íslandi. Hvalaskoðun fellur undir hugtakið "eitthvað annað" í atvinnusköpun í stað mengandi stóriðu og þungaiðnaði.

Vestfirðingar geta nýtt þetta ósnortna svæði með tignarlegum fossum í Hvalá og  Rjúkanda til að sýna ferðamönnum og er nauðsynlegt að finna þolmörk svæðisins. Umhverfisvæn og sjálfbær ferðaþjónusta getur vaxið þarna rétt eins og hvalaskoðun. Fari fossarnir í ginið á stóriðjunni, þá rænum við komandi kynslóðum arðbæru tækifæri. Það megum við ekki gera fyrir skammtímagróða vatnsgreifa.

Ég ferðaðist um Vestfirði í sumar. Dvaldi í nokkra daga á Barðaströnd og gekk Sandsheiði, heimsótti Lónfell hvar Ísland fékk nafn, Hafnarmúla, Látrabjarg og Siglunes. Það var fámennt á fjöllum og Vestfirðingar eiga mikið inni. Þeir verða einnig að hafa meiri trú á sér og fjórðungnum. Hann býður upp á svo margt "eitthvað annað".

Við viljum unaðsstundir í stað kílóvattstunda.

Fyrstu myndir sem teknar voru í hvalaskoðun á Íslandi 1993 og birtust í fjölmiðlum. Þá fóru um 150 manns í skipulagðar hvalaskoðunarferðir. Í dag fara 354.000 manns á ári. Það er eitthvað annað.

Marga þyrstir í heiðarvötnin blá

Athugasemdir

[Sigurpáll Ingibergsson, 14.10.2017 kl. 21:07]

Grein í Kjarnanum um fjárfestingar í "eitthvað annað"

https://kjarninn.is/skyring/2016-01-19-fjarfesting-i-einhverju-odru-17faldadist-i-fyrra/

[Ómar Ragnarsson, 14.10.2017 kl. 21:36]

Ég var oft á ferðinni um Suðausturland á þessumm árum og man vel eftir umræðunni um þá hugmynd að hvalaskoðin gæti orðið arðbær. Það var nánast allt á eina lund:  "Fráleit hugmynd, - líkast geimórum." 

Ég man enn eftir svokölluðu "uppistandi" (stand-up) mínu fyrir framan bátinn, þar sem hann lá í Hornafjarðarhöfn þegar ég sagði eitthvað á þessa leið:  "Eitt sinn fyrir tæpum 2000 árum gekk predikari einn að fiskimanni við Genearetvatn og sagði við hann: "Fylg þú mér. Héðan í frá skalt þú menn veiða." 

Ég fékk heldur betur orð í eyra fyrir ósæmilegt orðbragð og misnotkun á heilagri bók. 

Og orðræðan var færð út og allt annað en stóriðja til að "bjarga þjóðinni" var kallað í hæðnistóni:  "Eitthvað annað", "fjallagrasatínsla" og "lopapeysuprjón", "Lattelepjandi auðnuleysingjar á kaffihúsum í 101 Reykjavík á móti rafmagni og lífskjarabótum, sem vilja fara aftur inn í torfkofana", "

[Sigurpáll Ingibergsson, 15.10.2017 kl. 10:50]

Takk fyrir þetta innlegg Ómar Ragnarsson. Gaman að heyra söguna um uppistandið í Hornafjarðarhöfn. Það þarf að hugsa út fyrir boxið!